थामे खोलाको बाढीले पाँच घर बगायो, बिजुली र संचार सेवा अवरुद्ध

भदौ १६, सोलुखुम्बु । सोलुखुम्बुको खुम्बु पासाङल्हामु गाउँपालिका–५ थामे क्षेत्रमा भदौ १५ गते राति परेको अविरल वर्षापछि आएको बाढीले ठूलो क्षति पु¥याएको छ । थामे खोलाको बग्ने धार परिवर्तन भई बस्तीमा पसेको बाढीले पाँचवटा घर पूर्णरूपमा बगाएको छ भने अन्य छवटा घरमा आंशिक क्षति पुर्याएको गाउँपालिकाले जानकारी दिएको छ । बाढीका कारण विद्युतको पोलहरूमा क्षति पुगेकाले सो क्षेत्रको विद्युत् आपूर्ति र संचार सेवा पूर्ण रूपमा अवरुद्ध भएको छ ।

घटनापछि सिंगो गाउँपालिका स्तब्ध बनेको छ भने तत्काल उद्धार तथा राहत कार्यमा स्थानीयवासी, सुरक्षा निकाय र सरोकारवाला निकायहरू परिचालित भएका छन् । गाउँपालिकाका प्रमुख प्रशासकीय अधिकृत सुजन कुमार बुढाथोकीद्वारा जारी गरिएको प्रेस विज्ञप्तिमा विपद्को यस घडीमा खोज, उद्धार तथा मानवीय सहायता कार्यमा संलग्न सबै निकाय तथा व्यक्तिहरूप्रति आभार व्यक्त गरिएको छ ।

हालसमेत लगातार वर्षा भइरहेकाले थप क्षतिको सम्भावना कायमै रहेको विज्ञप्तिमा उल्लेख गरिएको छ। गाउँपालिकाले थामे क्षेत्रका साथै सम्पूर्ण थामेबासीहरूलाई आवश्यक सतर्कता अपनाउन र सम्भव भएसम्म सुरक्षित स्थानमा बस्न आग्रह गरेको छ । प्राकृतिक प्रकोपबाट प्रभावित परिवारहरूको सुरक्षाका साथै राहत व्यवस्थापनमा थप संयोजन र सहकार्य आवश्यक देखिएको छ ।