अचानक अस्वस्थ बनेका ट्रक सहचालकको सडकमै मृत्यु

भदौ १७, सोलुखुम्बु । खोटाङको हलेसी तुवाचुङ नगरपालिका–७ ऐसेलुखर्कस्थित मध्यपहाडी लोकमार्गमा ट्रकका सहचालकको मृत्यु भएको छ । मिर्चैयाबाट दिक्तेलतर्फ गइरहेको प्रदेश १–०२–००२ ख ०८०२ नम्बरको ट्रकमा सहचालकको रूपमा सवार उदयपुरको कटारी नगरपालिका–३ सिम्ले निवासी ३२ वर्षीय जीवन बरुवालको मृत्यु भएको हो । स्वास्थ्यमा गम्भीर समस्या देखिएपछि ट्रकका चालकले सवारी रोकेर उनलाई गाडीबाट झारेका थिए ।

त्यसपछि बरुवालले सडकको छेउको नालीमा रगतको वान्ता गरी त्यहीं घटनास्थलमै प्राण त्यागेका हुन् । घटनाबारे जानकारी पाएलगत्तै इलाका प्रहरी कार्यालय (इप्रका) हलेसीबाट प्रहरी नायब निरीक्षक कुलबहादुर मगरको नेतृत्वमा ४ जना प्रहरीको टोली खटिएको थियो । घटनास्थल सुरक्षित राख्दै थप अनुसन्धानका लागि प्रहरी निरीक्षक हेमन्त राईको कमाण्डमा थप ५ जनाको टोली परिचालन गरिएको प्रहरीले जनाएको छ ।

इलाका प्रहरी कार्यालय हलेसीका अनुसार घटनास्थल इप्रकाबाट करिब ५ किलोमिटर उत्तर–पूर्वमा पर्छ । प्रहरीले कानुनी प्रक्रिया पूरा गरी मृतकको शव पोष्टमार्टमको लागि कटारी अस्पताल, उदयपुर पठाएक जिल्ला प्रहरी कार्यालय खोटाङका सूचना अधिकारी प्रहरी निरीक्षक सुसान्त मिश्रले बताउनुभएको छ ।