सगरमाथामा थुप्रिएको फोहोर संकलन गर्न ड्रोनको प्रयोग

भदौ १८, सोलुखुम्बु । विश्वको सर्वोच्च शिखर सगरमाथामा थुप्रिने गरेको फोहोर सङ्कलन गर्न ड्रोनको प्रयोग हुँदै आएको छ । बीवाईडीको नेपालका लागि आधिकारिक बिक्रेता साइमक्स इङ्कले नेपालको ड्रोन कम्पनी एअरलिफ्ट टेक्नोलोजीसँगको समन्वयमा ड्रोनमार्फत फोहर सङ्कलन गरिरहेको हो । साइमक्स इङ्कका अनुसार कम्पनीले सगरमाथा क्षेत्रबाट एक हजार किलो फोहर सङ्कलनको लक्ष्यसहित काम गरिरहेको छ ।

बीवाईडीले विश्वव्यापी रुपमा ‘कूल द अर्थ वाई वान डिग्री’ नाराका साथ जलवायु परिवर्तन विरुद्ध शुरू गरेको अभियानअन्तर्गत नै नेपालमा सगरमाथा क्षेत्रमा फोहर सङ्कलन अभियान शुरू गरेको हो । यो अभियान स्वच्छ ऊर्जाको प्रवद्र्धन र शून्य कार्बन उत्सर्जनमार्फत पृथ्वीको तापक्रम वृद्धिलाई नियन्त्रणमा राख्ने उद्देश्यले विश्वव्यापी रुपमा शुरू गरिएको हो । साइमक्स इङ्कका प्रमुख कार्यकारी अधिकृत (सीईओ) साहिल श्रेष्ठले आफूहरूले सामाजिक उत्तरदायित्वअन्तर्गत आर्थिक र प्राविधिक रुपमा यस अभियानमा जोडिएको बताउनुभयो ।

एअरलिफ्ट टेक्नोलोजीका निर्देशक मिलन पाण्डेका अनुसार फोहर सङ्कलनमा प्रयोग हुने ड्रोनहरूले झण्डै १५ मिटर प्रतिसेकेन्डको गति र १५ डिग्री सेल्सियसको चिसोमा काम गर्न सक्छन् । उहाँका अनुसार सगरमाथाको ६ हजार एक सय ३० मिटरको उचाइमा रहेको फोहर ड्रोनको प्रयोग गरी आधार शिविरमा ल्याउने काम भइरहेको छ । सगरमाथा प्रदूषण नियन्त्रण समिति र खुम्बु पासाङल्हामु गाउँपालिकाको सहकार्यमा फोहर व्यवस्थापन पनि भइरहेको उहाँको भनाइ छ ।

सन् २०२४ मा सगरमाथाको क्याम्प–१ बाट २३४ किलो र अमादब्लम हिमालबाट ६ सय ४१ किलो फोहर सङ्कलन गरिएको थियो । नेपाल पर्वतारोहण सङ्घका प्रथम उपाध्यक्ष तथा आरोही मिङ्मा डेभिड शेर्पाले आरोहीले सगरमाथामै फोहर छाड्ने गरेकाले समस्या हुँदै आएको बताउनुभयो । सगरमाथाबाट फोहर सङ्कलनमा ठूलो खर्च र जोखिम हुने हुँदा प्रविधिको प्रयोगले निकै सहज भएको उहाँले बताउनुभयो । समाचार लेख