नेचासल्यान गाउँपालिकामा स्थानीय बाली र तेलहन खेती प्रवद्र्धनमा नयाँ पहल

भदौ १८, सोलुखुुम्बु ।  सोलुखुम्बुको नेचासल्यान गाउँपालिकाले कृषि क्षेत्रलाई थप सशक्त बनाउन तेलहन तथा रैथाने बाली प्रवद्र्धन कार्यक्रम अघि बढाउने निर्णय गरेको छ । चालु आर्थिक वर्ष २०८२/०८३ को बार्षिक कृषि विकास तथा व्यवसाय प्रवद्र्धन कार्यक्रमको अन्तर्गत ७५ प्रतिशत अनुदानमा कृषकलाई स्थानीय बिउ वितरण गरिने भएको हो ।

गाउँपालिका कृषि शाखाले तोरी, फापर, जौ, उवा लगायतका रैथाने बालीका स्थानीय बिउ वितरण गर्ने तयारी गरेको छ । बिउ पाउन इच्छुक कृषकहरूले भदौ १८ देखि अशोज १ गतेसम्म आवश्यक कागजातसहित कृषि शाखामा निवेदन दिन सक्नेछन् । कृषि शाखा प्रमुख सबिता बास्तोलाका अनुसार, कार्यक्रमले कृषकहरूलाई मात्र नभई गाउँपालिकाको समग्र आर्थिक विकासमा पनि योगदान पुर्याउने विश्वास व्यक्त गर्नुभएको छ ।

स्थानीय तहबाट सञ्चालन भएको यस पहलले परम्परागत खेतीलाई आधुनिक प्रविधिसँग जोड्दै कृषकहरूको आयस्तरमा सुधार ल्याउने उद्देश्य राखेको छ। साथै, परम्परागत बाली संरक्षण गरेर जैविक विविधता कायम राख्न पनि यो कार्यक्रमले महत्त्वपूर्ण भूमिका खेल्ने अपेक्षा गरिएको छ ।