निजामती सेवामा पारदर्शिता र नागरिकमैत्री सेवा आवश्यकतामाथि जोड दिदै सोलुखुम्बुमा निजामती दिवस मनाइयो

भदौ २२, सोलुखुम्बु । हिमाली जिल्ला सोलुखुम्बुमा निजामती दिवस विविध कार्यक्रमसहित मनाइएको छ । “व्यवसायिक र सिर्जनशील प्रशासन : विकास, समृद्धि र सुशासन” भन्ने नारासहित उक्त दिवस मनाइएको हो । कार्यक्रममा निजामती सेवा प्रणालीको सुदृढीकरण, पारदर्शिता र जवाफदेहिताको आवश्यकता बारे विशेष जोड दिइएको छ ।

कार्यक्रममा प्रमुख अतिथि कृष्ण प्रसाद निरौलाले निजामती सेवकहरूलाई राष्ट्र विकासका आधारशिलाका रूपमा चित्रण गर्दै सेवा प्रवाहमा अझै पारदर्शिता, सरलता र जवाफदेहिताको अभाव रहेको बताउनुभयो । उहाँले सेवामा सरलीकरण र जनउत्तरदायित्व वृद्धि गर्नुपर्ने आवश्यकता समेत औंल्याउनुभएको छ ।

त्यसैगरी, प्रमुख जिल्ला अधिकारी पाण्डेले निजामती सेवालाई राष्ट्रको मेरुदण्ड भनेको बताउनुभयो । उहाँले निजामती कर्मचारीहरूबाट नागरिकमैत्री, उत्तरदायी र नीतिनिष्ठ सेवाको अपेक्षा रहेको उल्लेख गर्दै सबै कर्मचारीले आफ्नो भूमिकालाई गम्भीर रूपमा आत्मसात् गर्नुपर्ने धारणा राख्नुभयो ।

दिवसको अवसरमा केदार माध्यमिक विद्यालयकी छात्रा निशा नेपालीले निबन्ध प्रस्तुत गर्नुभएको थियो । नेपालीले निजामती सेवाको महत्वलाई गहिरो ढंगले उजागर गरेको भन्दै सहभागीहरुले खुलेर प्रशंसा गरेका छन् । सोलुखुम्बु उद्योग वाणिज्य सङ्घको सभाहलमा आयोजित सो कार्यक्रममा जिल्लाका सरकारी कार्यालयका कर्मचारी, विद्यार्थी, नागरिक समाजका प्रतिनिधि र विभिन्न निकायका प्रमुखहरूको उल्लेख्य उपस्थिति रहेको थियो ।