योगा अहिलेको जीवनशैलीका लागि अपरिहार्य छ : प्रमुख निरौला

भदौ २२, सोलुखुम्बु । जिल्ला आयुर्वेद स्वास्थ्य केन्द्र संचालक समितिका अध्यक्ष तथा जिल्ला समन्वय समितिका प्रमुख कृष्ण प्रसाद निरौलाले योगा अहिलेको जीवनशैलीका लागि अपरिहार्य भएको बताउनुभएको छ । आइतबार रेडियो एभरेष्टसँगको कुराकानीमा उहाँले हरेक व्यक्तिको शारीरिक तथा मानसिक स्वास्थ्यका लागि योगा अत्यन्तै आवश्यक भएको बताउनुभएको हो । प्रमुख निरौलाले सल्लेरीमा हरेक बिहान नियमित योगा कार्यक्रम संचालन हुँदै आएको जानकारी दिनुभयो ।

योगाले शरीरमा ऊर्जा बढाउने, मानसिक सन्तुलन कायम गर्ने र दीर्घकालीन रोगहरूको रोकथाममा महत्वपूर्ण भूमिका खेल्ने उल्लेख गर्नुभयो । उहाँले जिल्लामा अझैसम्म आयुर्वेद स्वास्थ्य केन्द्रको आफ्नै भवन नहुनु दुःखद पक्ष भएको बताउँदै सेवाग्राहीलाई सहज सेवा दिन कठिनाइ भैरहेको स्पष्ट गर्नुभयो । भवन निर्माणका लागि आवश्यक प्रक्रिया अघि बढाइएरहेको उहाँको भनाई छ ।

२०६२ सालमा स्थापना भएको जिल्ला आयुर्वेद स्वास्थ्य केन्द्रले ओपीडी सेवा, पञ्चकर्म तथा पूर्वकर्म अभ्यास, स्नेहन, स्वेदन, जेष्ठ नागरिक सेवा, स्तनपायी तथा दुग्धवर्धक औषधि सेवा, र प्रयोगशालाका विविध सेवाहरु प्रदान गर्दै आएको छ । बहुमूल्य जडिबुटी पाईने जिल्ला भएकाले यी स्रोतको भरपूर उपयोग गरेर गुणस्तरीय आयुर्वेद सेवा दिन आफु कटिबद्ध रहेको प्रमुख निरौलाले प्रतिबद्धता व्यक्त गर्नुभयो ।उहाँले संचालक समितिको अध्यक्षका रुपमा कार्यालयका हरेक बैठकमा सक्रिय सहभागिता जनाउने प्रयास गर्दै आएको पनि जानकारी दिनुभयो ।