लिखुपिकेका २२ जनाको  राष्ट्रिय परिचयपत्र विवरण सङ्कलन 

भदौ २३, सोलुखुम्बु । जिल्ला प्रशासन कार्यालय सोलुखुम्बुले पालिका पालिकामै गएर राष्ट्रिय परिचयपत्र विवरण सङ्कलन कार्य धमाधम गरिरहेको छ ।  कार्यालयले जिल्लाका विभिन्न ३ पालिकामा पुगेर राष्ट्रिय परिचयपत्र विवरण सङ्कलन गर्ने कार्य सुरु गरेको थियो । ज्येष्ठ नागरिक र फरक क्षमता भएका नागरिकको सहजताका लागी कार्यालयले पालिका पालिकामै गएर विवरण सङ्कलन गर्ने याेजना बनाए अनुसार स्थानीय तह पुगेको हो ।

  यसैक्रममा कार्यालयले जिल्लाको लिखुपिके गाउँपालिकामा आइतबारबाट राष्ट्रिय परिचय पत्र विवरण सङ्कलन कार्य सुरु गरेको छ ।  २ दिने विवरण सङ्कलन अभियान अन्तर्गत कार्यालयले आइतबार लिखुपिके गाउँपालिकाका २२ जनाको विवरण सङ्कलन गरेको छ ।  गाउँपालिका अध्यक्ष मिना कार्की बस्नेतको अध्यक्षता तथा उपाध्यक्ष ङवाङ ल्हाक्पा शेर्पाको विशेष आतिथ्यतामा एक औपचारिक कार्यक्रम गरि पालिकामा हिजो २२ जनाले विवरण बुझाएको गाउँपालिकाका सूचना अधिकारी प्रमिला कार्कीले जानकारी दिनुभयो ।

 उहाँले सोमबार सम्म चल्ने विवरण सङ्कलन अभियानमा सोमबार हिजो भन्दा बढी विवरण सङ्कलन गर्ने अपेक्षा लिएको समेत उल्लेख गर्नुभयो । १८ गतेबाट थुलुङ दुधकोकोशीबाट सुरु भएको अभियानमा थुलुङ दुधकोशीका १ सय ६४ जनाको विवरण सङ्कलन गरिएको थियो । यस्तै नेचासल्यान गाउँपालिकाका २ सय बढी ज्येष्ठ नागरिकले राष्ट्रिय परिचयपत्रको विवरण अद्यावधिक गराएका छन् भने आज लिखुपिके र नेचासल्यानको राष्ट्रिय परिचयपत्र विवरण सङ्कलन अभियान सम्पन्न हुने जनाइएको छ ।

राष्ट्रिय परिचयपत्र विवरण सङ्कलन कार्यका लागी जिल्ला प्रशासन कार्यालयमै आउनुपर्ने बाध्यता भएकाले त्यसो गर्न फरक क्षमता भएका र वृद्धवृद्धालाई समस्या हुने भएकाले प्रशासनले पालिकामै गएर विवरण सङ्कलन गरिरहेकाे जिल्ला प्रशासनकाे कार्यालयका सूचना अधिकारी सुरेन्द्र थापाले बताउनुभयो ।