सोलुखुम्बुका बन्द शैक्षिक संस्था पुनः सञ्चालनमा

भदौ २९, सोलुखुम्बु । जेनजी आन्दोलनपछिको परिस्थितिका कारण बन्द रहेका सोलुखुम्बुका शैक्षिक संस्था पुनः सञ्चालनमा आएका छन् । यही भदौ २४ गतेदेखि बन्द भएका सामुदायिक तथा संस्थागत विद्यालयहरू आइतबारदेखि क्रमशः सञ्चालनमा आउन थालेका हुन् ।

जिल्ला शिक्षा समन्वय इकाइ सोलुखुम्बुका प्रमुख पुण्यराज डंगोलका अनुसार, आन्दोलनका कारण केही दिनदेखि स्थगित रहेका विद्यालयहरू आजदेखि पुनः सञ्चालनमा आएका छन् । तर, थुलुङ दुधकोशी गाउँपालिकाभित्रका विद्यालय भने भोलिदेखि मात्रै सञ्चालनमा आउने पालिकाले जनाएको छ । आन्दोलनको अवधिमा जिल्लाभरका विद्यालयहरू बन्द रहँदा वैकल्पिक रूपमा अनलाइन कक्षा समेत सञ्चालन नभएको जनाइएको छ । यसले विद्यार्थीको अध्ययनमा प्रत्यक्ष असर पारेको छ ।

विशेषगरी, परीक्षाको तयारीमा जुटिरहेका विद्यार्थीहरूका लागि शैक्षिक सत्र नै प्रभावित भएको सरोकारवालाहरूले बताएका छन् । आन्दोलनको दौरान पालिकाहरूले आ–आफ्नै समय तालिका अनुसार बिदा दिएको हुँदा शैक्षिक गतिविधिमा एकरूपता कायम रहन सकेनको थिएन् ।

यद्यपि, आन्दोलनको असर कम हुँदै गएसँगै जिल्लाका सोलुदुधकुण्ड नगरपालिका, माप्य दुधकोशी, सोताङ, महाकुलुङ, नेचासल्यान, लिखुपिके र खुम्बु पासाङल्हामु गाउँपालिकाका अधिकांश विद्यालयहरूले कक्षा सञ्चालन सुरु गरिसकेका छन् । शिक्षा क्षेत्र प्रभावित हुने अवस्थाले दीर्घकालीन असर पार्न सक्ने भएकाले अब नियमित पठनपाठनमा ध्यान दिनुपर्ने स्थानीय शिक्षा अधिकारकर्मीहरूको भनाइ छ ।