सोलुखुम्बुका तीन स्थानीय तहमा फलफूल बगैंचा स्थापनाका लागि अनुदान, आवेदन खुला

भदौ २९, सोलुखुम्बु । सोलुखुम्बुको तीन स्थानीय तहमा फलफूल बगैंचा स्थापनाका लागि अनुदान कार्यक्रम संचालनमा ल्याइएको छ। पहाडी क्षेत्र काष्ठफल तथा फलफूल विकास आयोजना अन्तर्गत कार्यान्वयन एकाइले कृषक समूह, सहकारी संस्था तथा कृषि उद्यमीहरूलाई लक्षित गर्दै अनुदानमा आधारित फलफूल बगैंचा स्थापना कार्यक्रम सञ्चालन गर्न लागेको हो।

जिल्लाको सोलुदुधकुण्ड नगरपालिका, थुलुङ दुधकोशी गाउँपालिका र माप्य दुधकोशी गाउँपालिकामा कार्यक्रम सञ्चालन हुनेछ । इच्छुक कृषि उद्यमी, कृषक समूह तथा सहकारीहरूले आजको मिति देखि ३४ दिनभित्र आवश्यक कागजातसहित सम्बन्धित स्थानीय तहको कृषि शाखामा आवेदन दिन आग्रह गरिएको छ ।

जिल्लाको सोलुदुधकुण्ड नगरपालिकामा स्याउ ११ हेक्टर, कागती १० हेक्टर, किवी २० हेक्टर, ओखर १० हेक्टर, थुलुङ दुधकोशी गाउँपालिकामा सुन्तला ४० हेक्टर, कागती ३० हेक्टर, किवी १० हेक्टर, एभोकाडो २० हेक्टर र माप्य दुधकोशी गाउँपालिकामा, सुन्तला ५० हेक्टर, कागती २० हेक्टर, किवी २० हेक्टर, ओखर २० हेक्टर, स्याउ १० हेक्टर कार्यक्रममा सहभागी हुन इच्छुक कृषक समूह, सहकारी तथा कृषि उद्यमीहरुलाई सम्बन्धित स्थानीय तहको कृषि शाखा वा आयोजनाको कार्यान्वयन एकाइमा सम्पर्क गरी आवेदन फारम तथा आवश्यक कागजात बुझाउने व्यवस्था मिलाउन आग्रह गरिएको छ ।

यस कार्यक्रमले सोलुखुम्बुको फलफूल उत्पादनलाई व्यावसायिक ढंगले विस्तार गर्ने विश्वास लिइएको छ। स्थानीय तहका कृषि शाखाहरूले अनुदानको सदुपयोग गराउन आवश्यक प्राविधिक सहयोग र अनुगमन गर्ने जनाएका छन् ।