थर्पुडाँडा माविको आयोजनामा विविध कार्यक्रम सहित शिक्षा दिवस मनाइयो

असोज २, सोलुखुम्बु । खोटाङको केपिलासगढी गाउँपालिका–५ स्थित थर्पुडाँडा माध्यमिक विद्यालयमा विविध कार्यक्रम आयोजना गरि शिक्षा दिवस मनाइएको छ । विद्यालयको आयोजनामा वडा नं ५ भित्रका सम्पूर्ण विद्यालयको संयुक्त सहभागितामा शिक्षा दिवसको अवसरमा विविध सहभागीमूलक तथा प्रतिस्पर्धात्मक कार्यक्रमहरू भव्य रूपमा मनाइएको हो ।

कार्यक्रम थर्पुडाँडा माध्यमिक विद्यालय व्यवस्थापन समिति अध्यक्ष रुपलाल राईको अध्यक्षता तथा वडा नं ५ का वडा अध्यक्ष हिमालभक्त राई प्रमुख आतिथ्यतामा कार्यक्रम सम्पन्न गरिएको विद्यालयका प्रध्यानाध्यापक ज्ञानु राईले जानकारी दिनुभयो ।

उहाँका अनुसार कार्यक्रम अन्तर्गत विभिन्न तहका विद्यार्थीहरूलाई लक्षित गरी ४–५ कक्षाका लागि हिसाब दौड, १–३ कक्षाका लागि ईन–आउट खेल, ४–५ कक्षाका लागि हाजिरी जवाफ, ६–८ कक्षाका लागि वक्तृत्वकला, ९–१० कक्षाका लागि निबन्ध लेखन, र १–५ कक्षाका लागि नृत्य प्रतियोगिता जस्ता आकर्षक प्रतिस्पर्धाहरूको आयोजना गरिएको थियो ।

शिक्षा दिवसको यस विशेष कार्यक्रमको सफल आयोजनाका लागि वडा नं ५ कार्यालयबाट १५,००० आर्थिक सहयोग प्रदान गरिएको थियो । कार्यक्रमले विद्यार्थीहरूमा सिर्जनशीलता, आत्मविश्वास र प्रतिस्पर्धात्मक भावना अभिवृद्धि गर्न मद्दत गरेको आयोजक पक्षको विश्वास रहेको छ ।