सोलुदुधकुण्ड नगरपालिकाको स्वास्थ्य समिक्षा, लक्ष अनुरुपको सेवा प्रबाह 

असोज २, विहिबार । सोलुखुम्बुको सोलुदुधकुण्ड नगरपालिकाले स्वास्थ्य क्षेत्रमा एक वर्षसम्म सञ्चालन गरिएका कार्यक्रमहरूको वार्षिक समीक्षा कार्यक्रम सम्पन्न गरेको छ ।  नगरपालिकाका प्रमुख नाम्गेल जाङबु शेर्पाको उपस्थितिमा सम्पन्न एक कार्यक्रमका बीच विहीबार नगरपालिकाले आफ्नो स्वास्थ्य सम्बन्धी कार्यक्रमहरुको वार्षीक समीक्षा सम्पन्न गरेको हो ।  ११ वटा वडा रहेको नगरपालिकाले १ अस्पताल, २ आधारभुत स्वास्थ्य इकाई र ८ वटा स्वास्थ्य चौकीमा आर्थिक वर्ष २०८१÷८२ मा सञ्चालन गरिएका कार्यक्रम तथा स्वास्थ्य सेवा प्रवाहको समीक्षा सम्पन्न गरेको नगरपालिकाका स्वास्थ्य शाखा प्रमुख चमर बहादुर मगरले बताउनुभयो ।

समीक्षाका क्रममा सबै स्वास्थ्य संस्थाका प्रतिनिधीले गत वर्ष सन्तोषजनक काम भएको प्रतिकृया दिएका थिए ।  खोप, पोषण, प्रसुती, स्वास्थ्य चेकजाँच, परिवार नियोजन लगायत स्वास्थ्य सँग सम्बन्धित सबैखाले काममा नगरपालिकाले लिएको रणनीति अनुरुप काम गर्न सफल भएको उल्लेख गरेका थिए । सो क्रममा नगरप्रमुख नाम्गेल जाङबु शेर्पाले नगरपालिकाले स्वास्थ्य क्षेत्रमा उल्लेख्य काम गरेको बताउँदै आफ्नो वार्षिक बजेटमा शिक्षा पछि धेरै बजेट स्वास्थ्य क्षेत्रमा विनियोजन गरेको बताउनुभएको थियो । उहाँले स्वास्थ्यकर्मीहरुलाई नतिजामुखी काम गर्नुपर्ने समय आएकोले सो अनुरूप काम गर्न निर्देश समेत गर्नुभएको थियो ।

समीक्षा कार्यक्रममा नगरपालिकाका स्वास्थ्य शाखा प्रमुख मगरले राज्यले स्वास्थ्य क्षेत्रको सुधारमा लिएको योजना बमोजिम ग्रामीण तथा हिमाली बस्तहिरुमा स्वास्थ्य सेवा प्रबाह गरिरहेको उल्लेख गर्नुभएको थियो ।

समीक्षाका क्रममा नगरपालिकाको वडा नम्बर १ का अध्यक्ष छोङ्वा शेर्पा, वडा नम्बर २ का अध्यक्ष ङवाङ ठिले शेर्पा, वडा नम्बर ३ का अध्यक्ष ल्हक्पा गेलु शेर्पा, वडा नम्बर ५ का अध्यक्ष मिङमार तामाङ, ६ का अध्यक्ष तथा नगर प्रवक्ता फुर्वा ग्याल्जेन शेर्पा, वडा नम्बर ७ का कार्यवाहक अध्यक्ष भलाकाजी कार्की लगायत जिल्ला अस्पताल फाप्लुका फोकल पर्सन सानी शेर्पा, स्वास्थ्य कार्यालयका प्रतिनिधि, जिल्ला आयुर्वेद कार्यालयका प्रमुख लगायत सबै वडाका स्वास्थ्य संस्थाका प्रमुख एवं प्रतिनीधीहरुको उपस्थिति रहेको थियो ।