संविधान दिवसको अवसरमा सोलुखुम्बुमा वृक्षारोपण

असोज ३, सोलुखुम्बु । सोलुखुम्बुमा संविधान दिवसको अवसरमा बृक्षारोपण गरिएको छ । शुक्रबार जिल्ला समन्वय समिति सोलुखुम्बुको आयोजनामा जिल्ला अस्पताल फाप्लु परिसरमा वृक्षारोपण गरिएको हो । वातावरण संरक्षण तथा हरियाली प्रवद्र्धन गर्ने उद्देश्यले जापानिज धुपीको विरुवा रोपिएको जिल्ला समन्वय समिति प्रमुख तथा अस्पताल व्यवस्थापन समिति अध्यक्ष कृष्ण प्रसाद निरौलाले बताउनुभयो ।

संविधान दिवसको अवसर पारेर गरिएको वृक्षारोपण कार्यक्रममा सहभागीहरूले संविधानले प्रत्याभूत गरेको स्वच्छ वातावरणमा बाँच्ने अधिकारको संरक्षण गर्न यस्ता कार्यक्रमहरू महत्वपूर्ण हुने धारणा व्यक्त गरेका छन् । यस्तै प्रमुख जिल्ला अधिकारी लिलाकुमारी खत्री पाण्डेले वातावरणीय सन्तुलन कायम राख्न समुदायस्तरबाट हुने यस्ता पहलहरूको निरन्तरताको आवश्यकता रहेको बताउनुभयो ।

वृक्षारोपण कार्यक्रममा डिभिजन वन कार्यालयका प्रमुख रामजी शाह, अस्पताल प्रशासन प्रमुख सानी शेर्पा, कृषि ज्ञान केन्द्रका प्रमुख दुर्गा बहादुर तिरुवा लगायत जिल्लास्थित सुरक्षा निकायका प्रमुखहरू तथा विभिन्न सरकारी कार्यालयका कर्मचारीहरूको सहभागिता रहेको थियो ।