चिशंखुगढी गाउँपालिका : चाडपर्व लक्षित पसल तथा होटलहरूमा अनुगमन

असोज ३, सोलुखुम्बु ।  चाडपर्व नजिकिँदै गर्दा उपभोक्ताको स्वास्थ्य सुरक्षालाई मध्यनजर गर्दै ओखलढुंगाको चिशंखुगढी गाउँपालिकामा किराना पसल तथा होटलहरूमा अनुगमन गरेको छ । गाउँपालिकाको वडा नं. ६ भदौरेमा बिहिबार अनुगमन गरिएको हो । जनस्वास्थ्य निरीक्षक थिर प्रसाद भट्टराईका अनुसार १० वटा किराना पसल र होटलहरूको अनुगमन गरिएको छ ।

अनुगमनका क्रममा व्यवसायीहरूलाई दर्ता तथा नवीकरण, मूल्य सूचीको स्पष्ट प्रदर्शन, खाद्य वस्तुहरूको उपभोग मिति र सरसफाइका मापदण्डबारे जानकारी प्रदान गरिएको थियो । दर्ता नगरी सञ्चालनमा रहेका केही पसल तथा होटललाई तत्काल आवश्यक प्रक्रिया पूरा गरी दर्ता गर्न निर्देशन दिइएको जनाइएको छ ।

भट्टराईका अनुसार उपभोक्ताको स्वास्थ्यमा प्रतिकूल असर पर्न सक्ने वस्तुहरूको प्रयोग नगर्न र गुणस्तरीय सेवा सुनिश्चित गर्न अनुगमन अभियान जारी रहनेछ ।