प्रहरी प्रभाग इमाडोलमा आगजनी र लुटपाट गर्ने सोलुखुम्बुका नेपालीसहित ६ जना पक्राउ

असोज ७, सोलुखुम्बु । जेनजी प्रदर्शनका क्रममा ललितपुरको इमाडोलस्थित प्रहरी प्रभागमा आगजनी र लुटपाट गरेको आरोपमा सोलुखुम्बुका सरोज नेपालीसहित ६ जना पक्राउ परेका छन् ।

पक्राउ परेकाहरूमा सोलुखुम्बु सोताङ गाउँपालिका–७ का २२ वर्षीय सरोज नेपाली, काभ्रेको पनौती नगरपालिकाका २० वर्षीय राजकुमार तामाङ, धनकुटाको पाख्रिबास नगरपालिका–६ का २२ वर्षीय गोकर्ण राई, रामेछापको मन्थली नगरपालिका–९ का २० वर्षीय कृष्णराज गिरी, उदयपुर सुन्दरपुरका ३१ वर्षीय सुनिल कुमार बस्नेत, र सिन्धुली भिमानका २१ वर्षीय नरेश तामाङ रहेका छन् ।

जिल्ला प्रहरी परिसर ललितपुरका प्रहरी वरिष्ठ उपरीक्षक (एसपी) तथा प्रवक्ता चक्रराज जोशीका अनुसार उनीहरूलाई ललितपुरका विभिन्न स्थानबाट पक्राउ गरिएको हो । घटनाबारे थप अनुसन्धानका लागि अदालतबाट म्याद लिएर प्रक्रिया अघि बढाइएको प्रहरीले जनाएको छ ।

उनीहरूलाई प्रहरी प्रभाग इमाडोलमा तोडफोड, आगजनी र लुटपाट गरेको अभियोग लागेको छ । घटनापछि प्रहरीले उनीहरूबाट प्रहरीले प्रयोग गर्ने एक जोर बुट, एक थान तिलहरी, झुम्का र मंगलसुत्र बरामद गरेको छ । यस विषयमा प्रहरीले थप अनुसन्धान जारी राखेको जनाएको छ ।