सोताङ गाउँपालिकालाई काठमाडौं महानगरको सहयोगः नयाँ एम्बुलेन्स हस्तान्तरण

असोज ७, सोलुखुम्बु । सोलुखुम्बुको सोताङ गाउँपालिकालाई काठमाडौं महानगरपालिकाले एउटा सुविधा सम्पन्न एम्बुलेन्स प्रदान गरेको छ । काठमाडौँ महानगरपालिकाले देशभरका दुर्गम तथा स्वास्थ्य सेवाबाट वञ्चित ३५ वटा स्थानीय तहलाई एम्बुलेन्स वितरण गर्ने योजना अन्तर्गत सोताङ गाउँपालिका पनि समावेश भएको हो ।

महानगरको स्वास्थ्य विभागद्वारा मंगलबार पहिलो चरणमा वितरण गरिएको एम्बुलेन्स सोताङ प्राथमिक अस्पताललाई प्रदान गरिएको हो । गाउँपालिका अध्यक्ष खिलराज बस्नेतले उक्त एम्बुलेन्स अस्पताललाई औपचारिक रूपमा हस्तान्तरण गर्नुभएको छ । नवीन एम्बुलेन्स प्राप्त भएसँगै अब गाउँपालिकामा तीनवटा एम्बुलेन्स सेवा सञ्चालनमा आउनेछ । विशेष गरी सुत्केरी महिलाहरूका लागि निःशुल्क ढुवानी सेवा प्रदान गर्दै आएको सोताङ प्राथमिक अस्पतालले नयाँ एम्बुलेन्सलाई पनि यस्तै सेवा विस्तारका लागि प्रयोग गर्ने जनाएको छ ।

काठमाडौँ महानगरपालिकाले पारदर्शी मापदण्डका आधारमा सातै प्रदेशका दुर्गम क्षेत्रका पालिकाहरूलाई प्राथमिकता दिँदै एम्बुलेन्स वितरण गरेको हो । स्थानीय तहबाट प्राप्त आवेदकहरू मध्येबाट मापदण्ड अनुसार छनोट गरी सेवा सम्पन्न एम्बुलेन्स वितरण गरिएको महानगरले जनाएको छ ।