सल्लेरी बजारमा दशैं–तिहार लक्षित बजार अनुगमन, म्याद गुज्रिएका सामग्री नष्ट

असोज ७, सोलुखुम्बु । चाडपर्व लक्षित गर्दै सोलुखुम्बुको सदरमुकाम सल्लेरी बजारमा आज संयुक्त बजार अनुगमन गरिएको छ । जिल्ला प्रशासन कार्यालयको अगुवाइमा घरेलु तथा साना उद्योग कार्यालय, उद्योग वाणिज्य संघ, र जिल्ला प्रहरी कार्यालयको टोलीले २१ खाद्य पसल, १० मासु तथा डेरी पसलमा अनुगमन गरेको हो ।

अनुगमनका क्रममा म्याद गुज्रिएका कोक, बिस्कुट, गुटखा लगायतका सामग्री बरामद गरी १९ हजार रुपैयाँ बराबरका वस्तु नष्ट गरिएको प्रशासनले जनाएको छ । सहायक प्रमुख जिल्ला अधिकारी सुरेन्द्र थापाका अनुसार, अधिकांश व्यापारी सहकार्यमा देखिए पनि केही ठाउँमा असावधानी देखिएको छ ।

म्याद गुज्रेका वस्तु बेच्ने व्यवसायीलाई २५ हजार रुपैयाँसम्म जरिवाना गरिने चेतावनी दिइएको छ । उद्योग वाणिज्य संघले व्यापारीहरूलाई उपभोक्ताको स्वास्थ्यप्रति जिम्मेवार बन्न आग्रह गरेको छ भने अनुगमन टोलीले उपभोक्तालाई पनि सतर्क रहन आह्वान गरेको छ ।