सोलुखुम्बुमा स्वास्थ्य क्षेत्रको वार्षिक समीक्षा, नतिजामुखी काम गर्नुपर्नेमा जोड 

असोज ७, सोलुखुम्बु । स्वास्थ्य कार्यालय सोलुखुम्बुमा स्वास्थ्य क्षेत्रको वार्षिक समीक्षा र आगामी कार्यदिशा सम्बन्धी छलफल सुरु भएको छ ।  मंगलबार बाट जिल्लाभरका ८ ओटै पालीकाका स्वास्थ्य शाखा प्रमुखहरूको उपस्थितिमा सल्लेरीमा समीक्षा कार्यक्रम सुरु भएको हो ।  कोशी प्रदेश स्वास्थ्य निर्देशनालय धनकुटाका निर्देशक ज्ञान बहादुर बस्नेतको उपस्थिति तथा जिल्ला समन्वय समिति सोलुखुम्बुका प्रमुख कृष्ण प्रसाद निरौलाको प्रमुख आतिथ्यतामा स्वास्थ्य कार्यालय सोलुखुम्बुको सभाहलमा समीक्षा सुरु भएको हो  ।

समीक्षाका क्रममा स्वास्थ्य निर्देशनालयका निर्देशक बस्नेतले स्वास्थ्य क्षेत्र नागरिकको सबैभन्दा महत्वपूर्ण र अत्यावश्यक सेवा भएको सर्वविदितै भएकाले दिनप्रतिदिन गुणस्तरीयता सुधारमा स्वास्थ्यकर्मी सँगै तत्तत्‌ निकाय लाग्नु पर्ने बताउनुभएको थियो ।  कार्यक्रममा बोल्दै जिल्ला समन्वय समितिका प्रमुख निरौलाले ८ ओटै पालिकामा भएका स्वास्थ्यकर्मीहरूको मनोबल बढाउन सम्बन्धित निकायहरूबाट ध्यान जान जरुरी देखिएको उल्लेख गर्नुभएको थियो ।

 उहाँले स्वास्थ्यकर्मीहरूलाई आवश्यक तालिमको अभावले विभिन्न खाले समस्याहरू आइरहेको बताउँदै आगामी दिनमा सुधार गरेर जानुपर्ने बताउनुभएको थियो ।  समीक्षा कार्यक्रममा बोल्दै कार्यालयका प्रमुख तथा समीक्षा कार्यक्रमका अध्यक्ष सुमन तिवारीले स्थानीय तह र कार्यालय बीचको समन्वय अभावका कारण अनेकन समस्याहरू आइरहेको उल्लेख गर्नुभएको थियो ।  उहाँले समग्र जिल्लाको स्वास्थ्य अवस्थाको बारेमा जानकारी गराउँदै देखिएका समस्याको समाधान गर्दै अर्को वर्ष अझ बढी प्रगति हासिल गर्ने र देखिने गरि काम गर्नुपर्ने उल्लेख गर्नुभएको छ ।