नेचासल्यान गाउँपालिकाले विद्यालयमा वितरण गर्यो सेनिटरी प्याड डिस्पोजल मेसिन

असोज ८, सोलुखुम्बु । सोलुखुम्बुको नेचासल्यान गाउँपालिकाले आफ्ना क्षेत्रभित्र रहेका विद्यालयहरूमा सेनिटरी प्याड डिस्पोजल मेसिन वितरण गरेको छ । बालिकामैत्री वातावरण निर्माण गर्ने उदेश्य सहित उक्त मेसिन वितरण गरेको हो ।

गाउँपालिकाले आर्थिक वर्ष २०८१/८२ मा केन्द्र सरकारबाट प्राप्त बचेको बजेट प्रयोग गरी १२ विद्यालयमा सेनिटरी प्याड डिस्पोजल मेसिन वितरण गरिएको गाउँपालिकाका अध्यक्ष धनजन राईले बताउनुभयो । हाल गाउँपालिकामा १४ वटा विद्यालय सञ्चालनमा रहेका छन् । तीमध्ये २ विद्यालयमा मात्र छात्र अध्ययनरत रहेकाले बाँकी १२ विद्यालयलाई उक्त मेसिन वितरण गरिएको हो । करिब ३ लाख रुपैयाँको लागतमा खरिद गरिएको मेसिन विद्यालयहरूमा हस्तान्तरण गरिएको जानकारी दिइएको छ ।

मेसिन हस्तान्तरणसँगै विद्यालयका प्रतिनिधिहरूलाई यसको प्रयोग, व्यवस्थापन र सरसफाइसम्बन्धी आवश्यक तालिमसमेत प्रदान गरिएको सहकर्मी सोभित ढुंगेलले जानकारी दिनुभयो । तालिममार्फत छात्राहरूलाई सरसफाइमा सजग गराउनुका साथै आत्मविश्वासका साथ अध्ययन गर्न प्रेरित गर्ने उद्देश्य लिइएको बताइएको छ । गाउँपालिकाले बालिकामैत्री वातावरण निर्माणलाई आफ्नो प्राथमिकतामा राख्दै आगामी दिनमा पनि यस्ता कार्यक्रमलाई निरन्तरता दिने प्रतिबद्धता जनाएको छ ।

यस पहलले छात्राहरूलाई विद्यालयमा सुरक्षित, स्वच्छ र सम्मानजनक वातावरणमा अध्ययन गर्न सहयोग पुग्ने अपेक्षा गरिएको छ । सेनिटरी प्याड डिस्पोजल मेसिन वितरण कार्यक्रम गाउँपालिका अध्यक्ष, उपाध्यक्ष, सम्बन्धित विद्यालयका प्रधानाध्यापक, शिक्षक, विद्यार्थी तथा अभिभावकहरूको उपस्थिति रहेको थियो ।