खुम्बु पासाङल्हामु गाउँपालिकाले सडक दस्तुर संकलन नगरेको स्पष्टिकरण

सोलुखुम्बु, भदौ १० । सोलुखुम्बुको खुम्बु पासाङल्हामु गाउँपालिकाले अहिले कुनै पनि प्रकारको सडक दस्तुर संकलन नगरेको स्पष्ट पारेको छ । हालै जिल्ला प्रशासन कार्यालय सोलुखुम्बुमा खरिखोला–सुर्के खण्डमा प्रतिव्यक्ति ५० रुपैयाँ लिइएको भन्ने गुनासो पुगेपछि गाउँपालिकाले विज्ञप्ति जारी गर्दै यस्तो स्पष्टिकरण दिएको हो ।

गाउँपालिकाका अनुसार आर्थिक ऐन २०८१ को व्यवस्था अनुरूप सल्लेरी–खरिखोला–थामडाँडा–सुर्के खण्डमा पर्ने ङिमडोर्जी शेर्पा पर्यटन सडक प्रयोग गर्ने यात्रुहरूसँग प्रति व्यक्ति ५० रुपैयाँ दस्तुर संकलन गर्ने व्यवस्था गरिएको थियो । उक्त दस्तुर खासगरी खरिखोला क्षेत्रमा संकलन हुँदै आएको थियो ।

तर, गाउँपालिकाको आर्थिक ऐन २०८२ लागू भएसँगै साउन १ गतेदेखि यो दस्तुर संकलन नगर्ने व्यवस्था गरिएको छ । प्रमुख प्रशासकीय अधिकृत नवराज गौतमका अनुसार नयाँ ऐन लागू भएपछि कुनै पनि सार्वजनिक वा निजी सवारीसाधनबाट दस्तुर लिने कार्य पूर्ण रूपमा बन्द गरिएको छ ।

गाउँपालिकाले यदि कसैले अवैधानिक रूपमा शुल्क संकलन गरेको पाइएमा कानुन बमोजिम कडा कारबाही गरिने चेतावनी समेत दिएको छ । यसैबीच, गाउँपालिकाले पर्यटक तथा स्थानीय यात्रुहरूलाई यस्तो गतिविधि देखेमा तत्काल सम्बन्धित निकायमा जानकारी गराउन पनि अनुरोध गरेको छ ।