भकान्जे स्वास्थ्य चौकीमा सुरु भयो निःशुल्क दन्त सेवा शिविर

असोज १२, सोलुखुम्बु । सोलुखुम्बुको लिखुपिके गाउँपालिका वडा नं. ५ स्थित भकान्जे स्वास्थ्य चौकीमा चार दिने निःशुल्क दन्त शिविर सुरु भएको छ । हिमालयन प्रोजेक्ट डेनमार्क र हिमालयन प्रोजेक्ट नेपालको आर्थिक तथा प्राविधिक सहयोगमा शिविर सुरु भएको हो । शिविरबाट सम्पूर्ण भकान्जेवासी तथा लिखुपिके–५ अन्तर्गतका विद्यालयका विद्यार्थीहरू लाभान्वित हुनेछन् ।

दाँतको समस्या बोकेर टाढासम्म जानुपर्ने बाध्यता हटाउन र समुदायमै सेवा उपलब्ध गराउने उद्देश्यले शिविरको आयोजना गरिएको हिमालयन प्रोजेक्टकी कार्यकारी निर्देशक जानकी खड्काले जानकारी दिनुभयो । शिविरका सम्योजक डा. जाङ्बु शेर्पाका अनुसार सेवा लिन आएका व्यक्तिहरूको दाँतको परीक्षण गरी आवश्यकता अनुसार दाँत भर्ने, निकाल्ने र सफा गर्ने जस्ता सेवाहरू प्रदान गरिनेछ ।

साथै, शिविरको माध्यमबाट दाँतलाई कसरी बलियो बनाउने र किराले खानबाट जोगाउने भन्ने जनचेतना फैलाउने अभियान पनि सञ्चालन गरिएको छ । शिविरले भविष्यमा देखा पर्न सक्ने दन्त समस्या न्यूनिकरण गर्न टेवा पुग्ने अपेक्षा गरिएको छ । चन्द्र ज्योति माविका शिक्षक देविन बस्नेतका अनुसार आईतबारबाट सुरु भएको यो शिविर चार दिनसम्म संचालन हुनेछ । दन्त स्वास्थ्यमा सुधार ल्याउने लक्ष्यसहित सुरु गरिएको यो पहलप्रति स्थानियवासी उत्साहित देखिएका छन् ।