बडहरे खोक्सेलीमा वडा स्तरीय पुरुष फुटबल प्रतियोगिता सम्पन्न

असोज १४, सोलुखुम्बु । हिन्दू नेपालीहरूको महान पर्व विजया दशमीको अवसरमा खोटाङको हलेसी तुवाचुङ नगरपालिका–४ बडहरे खोक्सेलीमा आयोजित वडा स्तरीय पुरुष फुटबल प्रतियोगिता भव्य रूपमा सम्पन्न भएको छ । खोक्सेलीका युवाहरूको सक्रियतामा आयोजित प्रतियोगितामा कुल ८ टिमले सहभागिता जनाएका थिए।

लक्ष्मी माध्यमिक विद्यालयमा अध्ययन गरेका पूर्व विद्यार्थीलाई समेट्दै प्रतियोगिता आयोजना गरिएको हो । प्रतियोगितामा हलेसी तुवाचुङ नगरपालिका–६ मङ्गलटारबाट तीन टिमले सहभागिता जनाएका थिए । खेलमा प्रगतिशील युवा क्लब मङ्गलटार ’बी’ प्रथम स्थान हासिल गर्न सफल भयो भने बिबिएस युथ क्लब, बोझे ले दोस्रो र प्रगतिशील युवा क्लब मङ्गलटार ’ए’ ले तेस्रो स्थान हात पारेका छन् ।

विजेता टोलीहरूलाई क्रमशः ८,०००, ४,५०० र ३,००० नगद पुरस्कार प्रदान गरिएको खोक्सेली युवा समूहका अध्यक्ष श्रवण कुमार भुजेलले जानकारी दिनुभयो । कार्यक्रमको प्रमुख आतिथ्य हलेसी तुवाचुङ नगरपालिका–४ का वडा अध्यक्ष किशोर कुमार बस्नेत रहनुभएको थियो ।

खेल क्षेत्रलाई अझ मजबुत बनाउँदै युवा प्रतिभालाई उजागर गर्ने उद्देश्यसहित प्रतियोगिता आयोजना गरिएको खोक्सेली युवा समूहका उपाध्यक्ष राजेश भट्टराईले बताउनुभयो । स्थानीय तहको सहयोग र युवाको सक्रियताले बडहरे खोक्सेलीमा यस्ता रचनात्मक कार्यक्रमले निरन्तरता पाउने अपेक्षा गरिएको छ ।