सगरमाथाको फोहोर कोसेली बन्दै, १० हजार केजी फोहोर कलामा परिणत 

असोज १८, सोलुखुम्बु । सगरमाथाबाट सङ्कलन गरिएको फोहोरलाई कोशेलीमा परिणत गर्ने अभियान अन्तर्गत १० हजार केजी फोहोरलाई कोशेलीमा परिणत गरिएको छ । स्वीडेनी नागरिक टमी गुस्ताफ्सनको संस्था सगरमाथा नेक्स्टले हाल सम्म सगरमाथा क्षेत्रबाट सङ्कलन भएको १० हजार केजी धातुजन्य तथा प्लाष्टिकजन्य फोहोरलाई कलात्मक सामग्रीमा परिणत गरिसकेको हो ।  २०२२ देखी हाल सम्म सङ्कलन गरिएको ४० हजार केजी फोहोर मध्ये १० हजार केजी फोहोरलाई कोशेलीमा परिणत गरिएको जनाइएको छ ।

सन २०२२ मा क्यारी मि ब्याक नाम अभियान सञ्चालन गरेर फोहोरलाई कलात्मक कोशेलीमा परिणत गर्ने अभियान चलाइरहेका उनले २०१९ बाटै हरेक वर्ष पदयात्रामा जाने पर्यटकहरूलाई १ केजीका दरले फोहोर लुक्ला ल्याउने अभियानमा जोडदै आएका थिए  । टमीको संस्थाले सगरमाथा क्षेत्रको करिव १ लाख २५ हजार हेक्टर क्षेत्रफलमा सरसफाइ गर्दै आएको छ । सन् २०२२ देखि यताको तीन वर्षको अवधिमा यस अभियान अन्तर्गत सगरमाथा क्षेत्रबाट ४० हजार केजी फोहोर सङ्कलन भइसकेको छ । अहिले पनि सगरमाथा नेक्स्टले आरोहण सिजन सुरु भएसँगै यस अभियानमा जोडिन चाहाने पर्यटकलाई आह्वान गर्दै आएको छ ।  

सगरमाथा क्षेत्रको फोहोर सङ्कलनमा योगदान गर्न चाहनेहरूले यसको सदस्यता लिन वेबसाइटमा गएर आवेदन दिन सकिने जनाइएको छ ।  सङ्कलन भएको फोहोरबाट बनाइएको सामाग्रीहरू युरोप सहित विभिन्न देशका पर्यटकहरूले चिनो स्वरुप लिएर जाने गरेका छन् भने कतिपय अवस्थामा टमी आफैले युरोप लगेर प्रदर्शनमा राख्ने गरेका छन् । यसका अलावा ३ हजार ७ सय ७५ मिटरमा अवस्थित सगरमाथा नेक्स्ट आर्ट ग्यालरीमा पनि प्रदर्शनमा राखिने गरेको छ ।

 यसले गर्दा अभियानमा जोडिने सदस्य र कलाकारहरूको राम्रो आम्दानी हुनका साथै सगरमाथा क्षेत्रको अकुत फोहोर व्यवस्थापन हुने सम्भावना देखिएको छ ।  सन् १९८३ मा पहिलो पटक नेपाल आएका टमी १९८५ देखी भने निरन्तर खुम्बु क्षेत्रको भ्रमण गर्दै आइरहेका छन् ।  खुम्बुको सुन्दरतामा पर्यटकबाट उत्सर्जन हुने फोहोर क्यान्सर जस्तै भइसकेको महसुस गरि पछिल्लो ९ वर्ष यता सगरमाथा क्षेत्रको फोहोर सङ्कलन गर्न सगरमाथा प्रदुषण नियन्त्रण समितिलाई सहयोग गर्दै आइरहेका छन् ।