सोलुखुम्बुका २२ सामुदायिक विद्यालयका ५८० विद्यार्थीलाई छात्रवृत्ति, दुई दिनमै सय विद्यार्थी लाभान्वित

असोज २१, सोलुखुम्बु । आर्थिक अभावका कारण शिक्षाबाट वञ्चित हुन सक्ने विपन्न तथा जेहेन्दार विद्यार्थीलाई लक्षित गर्दै सोलुखुम्बुका सामुदायिक विद्यालयमा अध्ययनरत करिब ५ सय ८० विद्यार्थीलाई छात्रवृत्ति वितरण गरिने भएको छ ।

शेर्पा बालबालिका सहायता संघको पहल तथा लोरेन्स नेपाल फ्रान्स र राइलेन्ड लोरेन नेपाल जर्मनीको आर्थिक सहयोगमा जिल्लाका २२ वटा सामुदायिक विद्यालयका विद्यार्थीलाई छात्रवृत्ति प्रदान गर्न लागिएको हो . असोज २० गतेदेखि सुरु भएको छात्रवृत्ति वितरण कार्यक्रम असोज २९ गतेसम्म सञ्चालन हुनेछ ।

कार्यक्रमअन्तर्गत पहिलो दुई दिनमै ३ सामुदायिक विद्यालयमा अध्ययनरत करिब १ सय विद्यार्थीलाई छात्रवृत्ति वितरण गरिसकिएको शेर्पा बालबालिका सहायता संघका कार्यक्रम संयोजक सन्तबहादुर बुढाथोकी मगरले जानकारी दिनुभयो । उहाँका अनुसार छात्रवृत्ति पाउने विद्यार्थी आर्थिक रूपमा गरिब तथा विपन्न परिवारका साथै अध्ययनमा जेहेन्दार विद्यार्थी रहेका छन्। आर्थिक अभावकै कारण बालबालिकाको पढाइ प्रभावित नहोस् भन्ने उद्देश्यले छात्रवृत्ति कार्यक्रम सञ्चालन गरिएको हो।

छात्रवृत्ति वितरणसँगै आगामी वर्षका लागि समेत विद्यार्थीको आवेदन संकलन भइरहेको संघले जनाएको छ। यसले हालका विद्यार्थीलाई सहयोग उपलब्ध गराउनुका साथै आगामी वर्ष छात्रवृत्ति पाउने सम्भावित विद्यार्थी पहिचान गर्नसमेत सहयोग पुग्ने जनाइएको छ।
कार्यक्रमअन्तर्गत सोलुदुधकुण्ड नगरपालिका, माप्य दूधकोशी गाउँपालिका र थुलुङ दूधकोशी गाउँपालिकाका सामुदायिक विद्यालयमा अध्ययनरत विद्यार्थीलाई छात्रवृत्ति प्रदान गरिनेछ ।

कार्यक्रम संयोजक बुढाथोकी मगरका अनुसार छात्रवृत्ति वितरणको काम अझै जारी रहेकाले तोकिएका सबै विद्यालयका विद्यार्थीलाई क्रमशः सहयोग उपलब्ध गराइनेछ। गरिबी र आर्थिक अभावका कारण शिक्षामा आउने अवरोध कम गर्दै विद्यालय जाने वातावरणलाई निरन्तरता दिन यस्ता छात्रवृत्ति कार्यक्रम प्रभावकारी हुने अपेक्षा गरिएको छ ।