सडक बचाउन ट्याक्टर निषेध, कुदाए १० हजार जरिवाना गराइने 

जेठ २२, सोलुखुम्बु । ओखलढुङ्गाको खिजीदेम्बा गाउँपालिकाको एक वडामा  ट्याक्टर चलाउन निषेध गरिएको छ ।  गाउँपालिकाको वडा नम्बर ९ ले एक सुचना जारी गर्दै जेठ २२ देखी असोज १५ गते सम्म ४ महिना ट्याक्टर प्रवेश निषेध गरेको हो ।

वडा कार्यालयले निर्णयनै गरेर सो अवधीका लागी वडाको तावर देखी किल्खोरदिङ गुम्बा जाने बाटो तावर देखी फोक्से डाँडा सम्म र खुन्दुर्के दोखी बाक्चीन्दो सम्म जाने बाटोमा ट्याक्टर कुदाउन निषेध गरिएको हो । यि सडकहरूमा वर्षायाममा ट्याक्टरका कारण एम्बुलेन्स र अन्य यात्रुबाहक सवारी साधनहरू सञ्चालन गर्न कठिनाइ हुने भन्दै वडाले निश्चित अवधीमा ट्याक्टर कुदाउन निषेध गरेको हो ।

सूचनाको बेवास्ता गरेर ट्याक्टर प्रवेश गराए १० हजार जरिवाना सहित स्थानीय सरकार सञ्चालन ऐन अनुसार कारवाही गरिने समेत जनाइएको छ ।  वैकल्पिक बाटोका लागी घुन्सा साल्मेबाट  बाट खसिपारे बाटो प्रयाग गर्न सकिन बताइएको छ ।  सडक स्तरोन्नतिका लागी सरकारले वर्षेनी बजेट विनियोजन गर्ने तर ट्याक्टरका कारण बाटो बिग्रँदा बालुवामा पानी जस्तै हुनेभएकाले केहि समयमा लागी ट्याक्टर निषेध गरिएको वडा अध्यक्ष ङवाङ फुरी शेर्पाले बताउनुभयो ।

दीर्घकालीन बाटो निर्माणका लागी सरकारले पर्याप्त बजेट नदिँदा सडकबाटो जोगाउन यो हतकण्डा अपनाउन परेको अध्यक्ष शेर्पाको भनाई छ ।  बर्षायमामा बाटोमा खाल्डाखुल्डी बनाउन ट्याक्टरको ठुलो हात हुन्छ । वर्षेनी बजेट यसकै मर्मतमा खर्च हुन्छ, अरु विकास कसरी गर्ने ? अध्यक्ष शेर्पाले भन्नुभयो ।