शिक्षकहरूका लागी १० दिने टिपिडी तालिम सम्पन्न 

जेठ २२, सोलुखुम्बु । शिक्षकहरूको पेशागत विकास तालिम टिपिडि आधारभूत तह सोलुखुम्बुमा सम्पन्न भएको छ । आज जनजागृति माध्यमिक विद्यालय सोलुखुम्बुमा विज्ञान विषयको दोश्रो र सामाजिक विषयको पहिलाे चरण अन्तर्गतको १० दिने तालिम सम्पन्न भएको हो । ग्रामीण शिक्षा तथा वातावरण विकास केन्द्र रीड नेपालको आयोजना तथा सोलुखुम्बुका स्थानीय तह र शिक्षा तालिम केन्द्र सुनसरीको समन्वयमा सम्पन्न तालिममा जिल्लाका ३८ जना शिक्षकको सहभागिता रहेको थियो ।

विज्ञान विषयका १८ जना र सामाजिक विषयका १९ जना गरि ३८ शिक्षक सहभागि तालिममा उनीहरूको  पेशागत विकासका सवालमा जानकारी दिनुका साथै प्रभावकारी शिक्षण सिकाइका विषयमा प्रशिक्षण गरिएको  छ । तालिमले शिक्षकहरूको पेशागत विकासका लागी महत्वपूर्ण कमा गर्ने ग्रामीण शिक्षा तथा वातावरण विकास केन्द्र रीड नेपालका शिक्षा विकास संयोजक केशवदेव गिरीले जानकारी दिनुभयो । तालिमबाट शिक्षकहरूलाई कक्षाकोठामा शिक्षण सामाग्री सहितको शिक्षण सिकाइको लागी प्रशिक्षित गराइएको उहाँको भनाई छ । रीड नेपालको करीव ६ लाख रुपैयाँ लागतमा तालिम सम्पन्न भएको संयोजक गिरिले बताउनुभएको छ ।

तालिम समापनका क्रममा कार्यक्रमका प्रमुख अतिथि गान्धिमाया तामाङले सहभागी शिक्षकलाई बधाई ज्ञापन गर्दै तालिममा मात्र नभएर शिक्षाको हर क्षेत्रमा शैक्षिक गुणस्तर बढाउन  रीड नेपालको योगदान उच्च रहेको बताउनु भयो । व्यक्ति राम्रो भन्दा पनि काम प्यारो हुने भन्दै  रीड नेपालको कामलाई सबैले मन पराएकाले  सकेसम्म जिल्लाका सबै विद्यालयमा नै कार्यक्रम सञ्चालन गर्न रीड नेपाललाई  आग्रह गर्नुभयो । यस्तै जनजागृति माविका प्रधानाध्यापक जनक कुमार थापाले शैक्षिक उन्नयनमा रीड नेपालको भूमिका अतुलनीय रहेको बताउँदै कार्यक्रमलाई निरन्तरता दिन आग्रह गर्नु भएको छ ।

त्यस्तै शिक्षा विकास तथा समन्वय इकाई प्रमुख पुण्यराज डङ्गोलले तालिमका सहभागीहरूलाई तालिम सम्पन्नका लागि बधाई दिँदै रीड नेपालको तालिम प्रभावकारी हुने भएकोले बालबालिका सम्म पुग्ने विश्वास व्यक्त गर्नुभएको छ  । उहाँले प्रमाणीकरण तालिमलाई नेपाल सरकारसँग समन्वय गरेर जिल्लामै सञ्चालन गरेकोमा सहभागी शिक्षक भाग्यमानी रहेको बताउनुभयो । रीड नेपालका शिक्षा विकास संयोजक तथा समापन कार्यक्रमका अध्यक्ष केशवदेव गिरीले शिक्षकको पेशागत विकास सँगै बालबालिकाको भविष्य पनि जोडिएको बताउनु भयो ।

रीड नेपालको केन्द्रबिन्दुको रुपमा बालबालिका रहेको भन्दै तालिममा सिकेका सीप विद्यालयमा लगेर बालबालिकासम्म पुगेर विद्यालयमा परिवर्तन आएपछि तालिम सफल भएको मानिने उहाँको भनाई छ ।  सहभागीहरू मध्यबाट सामाजिक विषयको समूहबाट बोल्दै पेल्माङ आ वि महाकुलुङका शिक्षक परमध्वज राईले तालिममा महत्वपूर्ण सिकाइ भएको बताउनुभएको छ ।

 उहाँले सुनसरी गएर लिनु पर्ने तालिम आफ्नै जिल्लामा लिन पाएकोमा खुसी व्यक्त गर्दै तालिममा सिकेका कुरा व्यवहारमा उतार्ने प्रतिबद्धता व्यक्त गर्दै रीड नेपाललाई धन्यवाद दिनुभएको छ । तालिममा सहभागि शिक्षकहरूलाई रीड नेपालका ४ जना विषय विज्ञ राजीव ढुंगाना, वासु वाग्ले, विष्णु उपाध्याय, अर्पण रेग्मी, सुजाता राई लगायतले  सहजिकरण गर्नु भएको थियो । चालु आर्थिक वर्षमा  ५० जना शिक्षकलाई टी.पी.डी. तालिम दिने लक्ष्य लिएको संस्थाले केही दिनमा नै गणित विषयको दोस्रो चरणको तालिम सञ्चालन गर्ने जनाएको छ  ।