ताप्लीमा सुनुवार राईहरूको पहिलो  जातीय सांस्कृतिक झाँकी प्रदर्शनी 

जेठ २१, सोलुखुम्बु ।  उदयपुरको ताप्ली गाउँपालिकामा जातीय सांस्कृतिक झाँकी सहितको प्रथम कार्यक्रम सम्पन्न भएको छ । किराँत राईको महान पर्व ऐले संवत ५०८४ उँधौलीको अवसरमा किराँत राई यायोक्खा तथा सुनुवार सेवा समाज ताप्लीको आयोजना, आदिवासी जनजाति महासंघ ताप्लि गाउँपालिकाको सहजिकरण तथा ताप्ली गाउँपालिका रुपाटारको सहयोगमा कार्यक्रम सम्पन्न भएको हो ।

ताप्ली गाउँपालिका १  ओख्ले साकेला पार्क माथिल्लो मादलेमा सम्पन्न कार्यक्रममा गाउँपालिका अध्यक्ष ढुङ्गराज विश्वकर्माको प्रमुख आतिथ्यता रहेको थियो । कार्यक्रमका अवसरमा आदिवासी जनजाती महासंघ ताप्ली गाउँपालिकाले तयार पारेको ताप्ली गाउँपालिकामा जनजातिहरूको स्थिति सम्बन्धी प्रतिबेदन सार्वजनिक गरिएको छ । कार्यक्रममा गाउँपालिका अध्यक्ष विश्वकर्माले ताप्लीको सम्पूर्ण क्षेत्रको विकास सँगसगै जातीय संस्कार संस्कृति संरक्षण र उत्थान गर्ने किसिमका कार्यक्रम गर्न बजेट बिनियोजन देखि नीति तथा नियम निर्माणमा कुनै कन्जुस्याइँ नरहने बताउनुभएको छ ।

 यस्तै लिम्चुङबुङ गाउँपालिकाका किराँती समुदायको नोछुङ पुरोहित गोविन्द चाम्लिङ बाट ताप्ली १ माथिल्लो मादले स्थित बेलिबुङ साकेला थानको समेत स्थापना गरिएको क्रम किराँत राई यायोक्खा ताप्ली गाउँपालिकाका अध्यक्ष ऋिदेन्द्र राईले बताउनु भएको छ । कार्यक्रममा किराँत राई तथा सुनुवार जातिहरूको साकेला सिली प्रदर्शन गरेका थिए । विभिन्न स्थानबाट सांस्कृतिक झाकी प्रदर्शन गर्नु सांस्कृतिक समूहहरूलाई प्रशंसा पत्र प्रदान समेत गरिएको छ ।

कार्यक्रमको समापन समारोहमा बोल्दै कार्यक्रमका सभाध्यक्ष ऋिदेन्द्र राईले जातीय हिसाबमा जनसंख्या बढी भएको समुदायमा भाषा पाठशाला स्थापना   तथा पाठ्यक्रम निर्माण को लागि स्थानिय तहले विशेष पहल कदम अगाडि बढाउनु पर्ने भनी स्थानीय सरकारलाई अनुरोध आग्रह गर्नुभएको छ ।  

कार्यक्रमको विशेष आतिथ्यता जिल्ला समन्वय समिति उप प्रमुख तेज प्रसाद गिरि, नेपाल आदिवासी जनजाति महासंघ ताप्लिका अध्यक्ष फडिन्द्र राई, लगायत ५ वटै वडाका वडाध्यक्षहरू, पार्टी प्रतिनिधि, शिक्षक र विभिन्न जातीय समुदायका सांस्कृतिक समूहका कलाकारहरूको उपस्थिति रहेको थियो ।