सोलुखुम्बुमा यस वर्षको दशैं शान्तिपूर्ण रुपमा सम्पन्न

असोज २१, सोलुखुम्बु । सोलुखुम्बुमा यस वर्षको दशैं चाड पूर्ण रूपमा शान्तिपूर्ण र मर्यादित तरिकाले सम्पन्न भएको छ । जिल्लामा दशैं अवधिभर कुनै पनि आपराधिक वा अवाञ्छित गतिविधिको रिपोर्ट नआएको जिल्ला प्रहरी कार्यालय सोलुखुम्बुका प्रहरी नायब उपरीक्षक (डिएसपी) मनोजित कुँवरले जानकारी दिनुभयो ।

उहाँका अनुसार चाडपर्व लक्षित सुरक्षा योजना प्रभावकारी ढंगले कार्यान्वयन गरिनुका साथै सर्वसाधारण नागरिकले पनि जिम्मेवार व्यवहार देखाएका कारण शान्तिपूर्ण दशैं सम्भव भएको हो । दशैं र तिहारजस्ता चाडपर्वहरूलाई लक्षित गर्दै सोलुखुम्बुमा विशेष सुरक्षा योजना लागू गरिएको छ ।

जिल्लाभर सादा पोशाकमा समेत बाक्लो संख्यामा प्रहरी परिचालन गरिएको छ । जिल्ला प्रशासन कार्यालयका अनुसार आउँदै गरेको तिहार पर्वलाई पनि शान्तिपूर्ण र मर्यादित रूपमा सम्पन्न गर्न सोही सुरक्षा योजना अझ कडाईका साथ लागू गरिनेछ ।

जिल्लामा शान्ति सुरक्षा कायम राख्न सुरक्षाकर्मीहरू सधैं सतर्क रहँदै आएका छन् भने नागरिकले पनि यस्ता चाडपर्वलाई शालीन ढंगले मनाउन प्रशासनले आग्रह गरेको छ । यता गत वर्षहरूमा साल्मे क्षेत्रमा भारी वर्षाका कारण जनजीवन प्रभावित हुने गरेको भए तापनि यस वर्ष भारी वर्षा हुँदा पनि पहिरो जस्ता प्राकृतिक विपद् नआएको प्रहरीले जनाएको छ ।