नेचातर्फ जाँदै गरेको सुमो सोलुदुधकुण्डमा दुर्घटना

सोलुखुम्बु, असोज २२ । सोलुखुम्बुको सदरमुकाम सल्लेरीबाट नेचातर्फ जाँदै गरेको ना.१ज ६९८९ नम्बरको सुमो गाडी सोलुदुधकुण्ड नगरपालिका–११ स्थित देउरालीमा दुर्घटनामा परेको छ । दुर्घटना मंगलबार साँझ करिब ७ बजे भएको हो ।

उक्त स्थान नेचासल्यान र ८६ मेगावाटको हाड्रोपावर आयोजनातर्फ जाने ‘जिरोपोइन्ट’ नजिक पर्छ । सुमो गाडीमा चालक मात्र सवार रहेको र हालसम्म उनको नाम भने सार्वजनिक गरिएको छैन । जिल्ला प्रहरी कार्यालय सोलुखुम्बुका प्रहरी निरीक्षक तथा सूचना अधिकारी विकास राईका अनुसार, सुमो गाडीलाई सकुशल रुपमा निकालिएको र गाडीलाई चालकको जिम्मा लगाइएको छ । प्रहरीका अनुसार घटनामा कुनै पनि मानवीय क्षति नभएको पुष्टि भएको छ । गाडी चिप्लिएर दुर्घटना भएको हुन सक्ने प्रहरीको अनुमान छ ।