महाकुलुङ ५ को ८० प्रतिशत बजेट सकियो

जेठ २२ सोलुखुम्बु । सोलुखुम्बुको महाकुलुङ गाउँपालिका वडा नम्बर ५ ले ८० प्रतिशत बजेट कार्यान्वयन गरिसकेको छ ।  चालु आर्थिक वर्ष २०८०÷८१ का लागी वडामा १५ वटा योजना सञ्चालनका लागी प्राप्त बजेट मध्ये हाल सम्म ८० प्रतिशत  कार्यान्वयन भइसकेको वडा अध्यक्ष महल सिं कुलुङले बताउनुभयो ।

वडालाई विभिन्न शीर्षकमा प्राप्त भएको ८० लाख रुपैयाँ बजेट मध्ये अव केही योजनाहरू सकिन बाँकी भएकाले हाल सम्म ८० प्रतिशत कार्यान्वयन भएको अनुमान वडा अध्यक्ष कुलुङको छ ।  वडामा चालु आर्थिक वर्षमा लक्षित बर्ग अन्तर्गत सबैभन्दा ठुलो कार्यक्रम महिलाको क्षेत्रमा राखिएको उहाँले बताउनुभयो । लक्षित समुह अन्तर्गत विनियोजित बजेट २० लाख बाट उक्त कार्यक्रमका लागी १६ लाख रुपैयाँ बजेट विनियोजन गरिएको थियो । उक्त बजेट कार्यान्वयन हुने चरणमा छ ।  यस्तै लक्षित बर्ग अन्तर्गत वडामा यो वर्ष ज्येष्ठ नागरिकका लागी  २ लाख ३० हजार, जनजातिका लागी २ लाख, फरक क्षमता भएकाहरूका लागी ७० हजार, बालबालिकाका लागी ३ लाख, कार्यालय सञ्चलन तथा विविध खर्चमा २ लाख बजेट विनियोजन भएको वडा अध्यक्ष राईले बताउनुभएको छ । यता पुँजीगत तर्फ वडामा प्राप्त ६० लाख बजेट पनि कार्यान्वयनको अन्तिम चरणमा रहेको उहाँले बताउनुभयो ।

वडामा पुँजीगत तर्फ प्राप्त उक्त बजेटबाट यस वर्ष गाउँघर चाचालुङ क्लिनिक तथा चर्पी तथा खानेपानी निर्माणका लागी २ लाख, चाचालुङ जागृती महिला समाजलाइ अदुवा खेतीका लागी १ लाख ५० हजार, गुदेल मावि विज्ञान ल्याब स्थापनाका लागी १ लाख ७५ हजार, अमर ज्योति आ वि घेराबाराका लागी ५ लाख २५ हजार, बफुदो खानेपानी मर्मत सम्भारका लागी ५ लाख, फुस्ला सामुदायिक भवन र सगरमाथा सामुदायिक भवन निर्माणका लागी १५ /१५ लाख, बौद्ध धर्म गुठि निर्माणका लागी १० लाख बजेट खर्च भएको छ ।