सोलुदुधकुण्डको प्रशासनिक भवन निर्माणको काम करिव आधा सकियो, चैत्र भित्रमा सक्ने गरी काम हुँदै 

असाेज २५ ,साेलुखुम्बु । सोलुखुम्बुका एकमात्र नगरपालिका सोलुदुधकुण्ड नगरपालिकाको प्रशासनिक भवन निर्माणको काम  ४४ प्रतिशत सम्पन्न भएको छ । २०८१ साल पौष देखी सुरु भएको प्रशासनिक भवन निर्माणको काम १० महिनामा ४४ प्रतिशत सम्पन्न भएको हो । गत साल कार्तिक ५ गते निर्माण कम्पनी पीआरएचवी जेभीले ७ करोड १४ लाख १९ हजार ३ सय रुपैयाँ भ्याट सहितमा ठेक्का सम्झौता गरि पौषमा निर्माण कार्य थालेको थियो ।  जिल्ला समन्वय समितिको को १ करोड ५० लाख सहित नगरपालिकाको बाँकी आर्थिक लागत साझेदारीमा भवन निर्माणको काम भइरहेको नगरपालिकाका योजना शाखा प्रमुख राम कुमार खड्काले बताउँनुभयो । साविक जिल्ला विकास समितिको सभाहल भत्काएर त्यस सहितको जग्गामा निर्माण सुरु गरिएको प्रशासनीक भवन जिल्लाकै नमुना र सुविधा सम्पन्न बनाउने गरि काम सुरु गरिएको नगरपालिकाले जनाएको छ ।  प्रशासनिक भवन निर्माण कार्यको काम हाल सम्म २ वटा तला ढलान भइसकेको छ ।  अव फिनिसिङ गर्ने नकामहरू, छानाको कामहरु, विद्युतीकरण जस्ता कामहरू बाँकी रहेको उहाँको भनाई छ ।  हाल नगरपालिकाको सेवा प्रवाह पुरानो गाविस भवनबाट कठिन तरिकाले भइसकेकोमा अव भवन निर्माण सम्पन्न गरेर व्यवस्थीत सुविधायुक्त भवनबाट नागरिकलाई सेवा दिन नगरपालिका लागी परिरहेको नगरप्रमुख नाम्गेल जाङबु शेर्पाले बताउनुभयो । भवन निर्माणको काम यही वर्षको चैत्रमा भित्रमा सक्नुपर्ने निर्माण कम्पनीको दायित्व छ ।