माप्यमा आयोजित फुटसल प्रतियोगिता सम्पन्न, न्यु रेन्टलले जित्यो प्रथम उपाधि

असोज २४, सोलुखुम्बु । सोलुखुम्बुको माप्य दुधकोशी गाउँपालिकामा आयोजित जिल्ला व्यापी खुल्ला ५ ए फुटसल प्रतियोगिताको उपाधि न्यु रेन्टल सर्भिसले हात पारेको छ । गत २२ गते बाट ३ दिन सम्म सञ्चालन भएको फुटसल प्रतियोगितामा सहभागी १४ वटा टिमलाई हराउँदै न्यु रेन्टल सर्भिसले उपाधि जितेको आयोजकले जनाएको छ । माप्य दुधकोशी गाउँपालिकाको वडा नम्बर ३ को हिमालय मावि खास्तापको प्राङ्गणमा सञ्चालन भएको प्रतियोगिताको दोश्रो स्थान बासा फुटबल क्लबले हात पारेको छ ।

गाउँपालिका अध्यक्ष बुद्धिकिरण राईको प्रमुख आतिथ्यतामा सम्पन्न फुटसल प्रतियोगिता खास्ताप फुटसल सङ्घले आयोजना गरेको थियो । प्रतियोगितामा विजेता र उपविजेता बाहेक उत्कृष्ट खेल प्रदर्शन गर्ने विधागत खेलाडीहरूलाई पनि पुरस्कृत गरिएको छ । प्रतियोगितामा टप स्कोर गर्दै टप स्कोररको पुरस्कार विजेता बासा फुटबल क्लबका खेलाडी खेम राई बनेका छन् । यस्तै टक्सीन्धु फूटबल क्लबका खेलाडी निखिल बिक उत्कृष्ठ गोल रक्षक बनेका छन् भने उपाधि विजेता टिम न्यु रेन्टलका खेलाडी सन्दिप मगर उत्कृष्ट खेलाडी बनेका छन् ।

प्रतियोगितामा उपाधि विजेता टिम न्यु रेन्टलले नगद ५० हजार र उपविजेता बासा फूटबल क्लबले २५ हजार नगदको साथमा ट्रफी मेडल र प्रमाणपत्रबाट पुरस्कृत गरिएको खेल संयोजक सुजन राईले बताउनुभयो । समापन कार्यक्रममा बोल्दै माप्य दुधकोशी गाउँपालिका अध्यक्ष एवं कार्यक्रमका प्रमुख अतिथि बुद्धिकिरण राईले आफ्नो कार्यकालमा युवाहरूको क्षमता विकाससँग सम्बन्धीत कार्यक्रमहरु गरेको बताउँदै खेल क्षेत्रमा एभरेष्ट भ्यु ट्रेल म्याराथन, विभिन्न प्रतियोगिताका साथै निर्णायक काम गरेको उल्लेख गर्नुभएको छ । प्रतियोगिता समापन कार्यक्रममा गाउँपालिका उपाध्यक्ष गौरव राई लगायत वडा अध्यक्षहरू, गाउँपालिकाका कर्मचारी, खेलाडी, विद्यार्थी, तथा स्थानहरूको बाक्लो उपस्थिति रहेको थियो ।