गाउँपालिकाले पुजारी हटाएको भन्ने प्रचार झुटो रहेको सोताङको प्रतिकृया 

असोज २५, सोलुखुम्बु । सोताङ गाउँपालिकामा रहेको पञ्चकन्या मन्दिरका पुजारी गाउँपालिकाले हटाइएको भन्ने हल्लामा कुनै सत्यता नभएको जनाइएको छ । गाउँपालिकाले एक विज्ञप्ति जारी गर्दै सदियौँ पुरानो मन्दिर र यससँग जोडिएको आस्थासँग गाउँपालिकाले कुनै खालको छेडखानी नगरेको जनाएको हो । एक विज्ञप्ति जारी गर्दै गाउँपालिकाले सामाजिक सञ्जालमा विभिन्न खाले टिक्का टिप्पणी गरि भ्रम फैलाइएको भन्दै गाउँपालिकाबाट पुजारी हटाउने वा मन्दिर व्यवस्थापन समिति खारेज गर्ने जस्ता कुनै पनि काम नभएको जनाएको हो ।

 गाउँपालिकाको वडा नम्बर १ मा व्याप्त खानेपानी सम्बन्धी समस्या समाधानका लागी गाउँपालिकाको २० प्रतिशत र भारतीय राजदूतावासको ८० प्रतिशत लागत साझेदारीमा खानेपानीको व्यवस्थापन गर्ने क्रममा मन्दिर छेउमा ट्याङ्की निर्माण गर्ने विषयलाई लिएर विवाद सुरु भएपछि मन्दिरको सञ्चालक समिति विघटन भएको थियो । त्यो विषयलाई लिएर गाउँपालिकाले विघटन गरको र पुजारी हटाइएको भन्ने हल्ला फिँजाइएको भन्दै गाउँपालिका प्रशासनले त्यसमा गाउँपालिकाको कुनै छेडखानी नभएको जिकिर गरेको हो ।

गाउँपालिकाले मन्दिरलाई पुरातत्व विभागमा सूचिकृतकाे पहल गरी  ८ करोडको मन्दिर निर्माणका लागी श्रोत सुनिश्चित गरिसकेको भन्दै गाउँपालिकाले मन्दिर प्रति गाउँपालिकाको श्रद्धाभाव रहेको जनाएको छ ।  गाउँपालिकाले अनर्गल प्रचार गरेर धार्मिक सहिष्णुता र आस्था माथि प्रहार नगर्न पनि अनुरोध गरेको छ । यस्तै उक्त खानेपानी आयोजनाको ९८ प्रतिशत काम सम्पन्न भइसकेको र बाँकी ३ सय मिटर पाइप पुर्ने काम समेत चाँडै सम्पन्न गरेर खानेपानी व्यवस्थापन गरिने गाउँपालिकाले दावि गरेको छ ।