सोलुखुम्बुको केरुङमा आगलागी, एक घर जलेर पूर्णरुपमा नष्ट

असोज २५, सोलुखुम्बु । सोलुखुम्बुको सोलुदुधकुण्ड नगरपालिका–८, केरुङमा आज बिहान भीषण आगलागी भएको छ । बिहान ११ बजे स्थानीय किपा शेर्पाको घरमा आगलागी हुँदा एकतले ढुङ्गा–माटोले बनेको घर पूर्ण रूपमा जलेर नष्ट भएको हो । वडा अध्यक्ष पासाङ कट्वालका अनुसार आगलागी भएको स्थानमा पर्याप्त पानीको अभाव भएका कारण आगो नियन्त्रणमा लिन कठिन भएको थियो । “आगलागी सुरु हुनासाथ निभाउने प्रयास गरिए पनि पानीको अभावले आगो नियन्त्रणमा आउन सकेन,” उहाँले बताउनुभयो ।

आगलागीको समयमा किपा शेर्पाको परिवार बिहानको खाना खाएर मेलापातका लागि बाहिर गएका थिए । स्थानीय बासिन्दाका अनुसार सम्भवतः ग्यास लिक भएर आगलागी भएको हुनसक्ने अनुमान गरिएको छ । प्रहरी, स्थानीय जनप्रतिनिधि तथा स्थानीयवासीहरूको सक्रियतामा अहिले पनि आगो निभाउने प्रयास जारी छ ।

आगलागीबाट घरभित्र रहेका नगद, महत्वपूर्ण कागजात र सम्पूर्ण सामग्री पूर्ण रूपमा नष्ट भएका छन्। तर मानविय क्षति भने नभएको पुष्टि भएको छ । घटनाबारे थप अनुसन्धान भइरहेको जिल्ला प्रहरी कार्यालयले जनाएको छ ।