ओखलढुंगामा विधुतीय कारोबार सम्बन्धी कसूरमा एक युवक पक्राउ

असोज २५, सोलुखुम्बु । विधुतीय कारोबार सम्बन्धी कसूर गरेको आरोपमा ओखलढुंगाका एक युवक पक्राउ परेका छन् । जिल्लाको मोलुङ गाउँपालिका–१ निवासी ३० वर्षीय ईश्वर वाग्लेलाई प्रहरीले नियन्त्रणमा लिएको हो ।

जिल्ला प्रहरी कार्यालय ओखलढुंगाका अनुसार एक महिलाले वाग्लेविरुद्ध विधुतीय कारोबार ऐन, २०६३ बमोजिम कसूर गरेको भन्दै रीतपूर्वक लिखित जाहेरी दिएकी थिइन् । उक्त जाहेरीको आधारमा वाग्लेलाई पक्राउ गरिएको प्रहरी कार्यालयले जानकारी दिएको छ ।

इलाका प्रहरी कार्यालय बरुणेश्वरबाट खटिएको प्रहरी टोलीले असोज २३ गते वाग्लेलाई पक्राउ गरेको जिल्ला प्रहरी कार्यालय ओखलढुंगाका प्रहरी निरीक्षक विजय कार्कीले जानकारी दिनुभयो । उहाँका अनुसार पक्राउ परेका वाग्लेलाई आवश्यक अनुसन्धानका लागि असोज २४ गते ओखलढुंगा जिल्ला अदालतबाट १० दिनको म्याद थप गरी अनुसन्धान प्रक्रिया अघि बढाइएको छ । प्रहरीले घटनासम्बन्धी थप अनुसन्धान जारी रहेको जनाएको छ ।