सोलुदुधकुण्ड–१० मा पुरुष भलिबल प्रतियोगिता कार्तिक २८ देखि सुरु हुने

असोज २६, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर १० मा पुरुष भलिबल प्रतियोगिता कार्तिक २८ देखि सुरु हुने भएको छ । वडा कार्यालयको र सेभेन समिट फाउण्डेसनको संयुक्त आयोजनामा हुने भनिएको वडा स्तरीय पुरुष भलिबल प्रतियोगिता तथा विविध कार्यक्रमहरु केही प्राविधिक कारणले कार्तिक १२ बाट सरेर अब कार्तिक २८ गतेदेखि सुरु हुने भएको हो । वडा अध्यक्ष होम बहादुर मगरका अनुसार प्रतियोगिता स्वर्गीय देण्डी शेर्पाको स्मृतिमा आयोजना गर्न लागिएको हो ।

खेलकुदको माध्यमबाट स्थानीय युवाहरुमा ऊर्जा, अनुशासन र एकताको भावना अभिवृद्धि गर्ने उद्देश्यले प्रतियोगिता आयोजना गरिएको आयोजकले जनाएको छ । प्रतियोगितामा प्रथम, द्धितिय, तृतीय र सान्त्वनाहरुले टिमले क्रमश ः १ लाख ३१ हजार, ८१ हजार, ६१ हजार र ३१ हजार रुपैयाँको साथमा ट्रफि, मेडल र प्रमाणपत्र प्राप्त गर्नेछन् । त्यस्तै, व्यक्तिगत विधातर्फ उत्कृष्ट प्रशिक्षकलाई ५ हजार, सर्वोत्कृष्ट खेलाडी, उत्कृष्ट स्पाइकर, सेटर, ब्लकर, डिफेन्डर र सर्भरलाई जनही ३ हजारसहित ट्रफी, मेडल र प्रमाणपत्र प्रदान गरिनेछ ।

खेलकुदसँगै कार्यक्रमलाई विविधात्मक बनाउन सांगीतिक साँझ तथा निःशुल्क आँखा परीक्षण शिविरसमेत सञ्चालन गरिने वडा कार्यालयले जनाएको छ । स्थानीय स्तरमा यस्ता कार्यक्रमहरूले खेल क्षेत्रको विकासमा टेवा पुर्याउनुका साथै जनसहभागिता र समुदायको एकता बलियो बनाउन मद्दत पुग्ने अपेक्षा गरिएको छ ।