असोज ३१, सोलुखुम्बु । उदयपुरको ताप्ली गाउँपालिका वडा नं ५ स्थित रुपाटारमा रहेको रुपारानी बहुउद्देशीय सहकारी संस्था लिमिटेडले शुक्रबारदेखि औपचारिक रूपमा दूध डेरी सञ्चालनमा ल्याएको छ । सहकारीले एक कार्यक्रमको आयोजना गरी ताप्ली गाउँपालिका अध्यक्ष ढुङ्गाराज विश्वकर्माको प्रमुख आतिथ्यमा डेरी उद्घाटन गरेको हो । कार्यक्रममा विभिन्न राजनीतिक दलका प्रतिनिधि, संघ–संस्थाका पदाधिकारी, समाजसेवी, शिक्षक, बुद्धिजीवी र कृषकहरूको उपस्थिति रहेको थियो ।
वि.सं.२०६६ मा स्थापना भएको सहकारीमा हालसम्म ३०६ जना सदस्य रहेका छन् भने कुल पूँजी ७० लाख रुपैयाँ बराबर रहेको सहकारीका अध्यक्ष दिनेश हमालले जानकारी दिनुभयो । सहकारीका अनुसार दूध डेरी सञ्चालनका लागि आर्थिक वर्ष २०८०/८१ मा गाउँपालिकाबाट १० लाख, चालु आर्थिक वर्षमा अर्को १० लाख र सहकारीको आफ्नै तर्फबाट थप १० लाख गरी कुल ३० लाख रुपैयाँको लागतमा डेरी सञ्चालन गरिएको हो ।
सहकारीका सचिव पारसमन मगरका अनुसार हाल डेरी सञ्चालनका लागि महेन्द्ररत्न मावि रुपाटारको एउटा भवन भाडामा लिएर सेवा सुरू गरिएको हो । ताप्ली गाउँपालिकाको पाँचै वडा कृषियोग्य भएको र अधिकांश कृषकले गाई, भैंसी, बाख्रा र बाङ्गुर पालन गर्दै आएको सन्दर्भमा, सहकारीले उत्पादन भएको कच्चा दूध संकलन गरी मूल्य निर्धारणसहित नियमित डेरी सेवा सञ्चालन गर्ने जनाएको छ ।
यसका साथै, सहकारीले विभिन्न समयमा कृषकहरूलाई सहुलियत दरमा रासायनिक मल वितरण, सस्तो ब्याजदरमा ऋण प्रवाह, र अन्य सामाजिक कार्यक्रमहरू सञ्चालन गर्दै आएको सहकारीका व्यवस्थापक रेणुका बुढाथोकीले जानकारी दिनुभयो । स्थानिय तह र अन्य संघसंस्थासँग साझेदारी गर्दै सहकारीले विकास, निर्माण, समाजिक रूपान्तरणका कार्यक्रमहरूमा समेत सक्रिय भूमिका निर्वाह गरिरहेको छ ।
Discussion about this post