असोज ३१, सोलुखुम्बु । उदयपुरको ताप्ली गाउँपालिका स्थित श्री माध्यमिक विद्यालय कटहरेमा शुक्रबार साप्ताहिक अतिरिक्त क्रियाकलाप अन्तर्गत कक्षा १ देखि ५ र कक्षा ६ देखि १० सम्मका विद्यार्थीबीच अन्तर सदनात्मक सांस्कृतिक नृत्य प्रतियोगिता तथा देउसी–भैलो कार्यक्रम भव्य रूपमा सम्पन्न भएको छ ।
कार्यक्रममा विद्यार्थीहरूले नेपाली सांस्कृतिक विविधता झल्काउने विभिन्न नृत्य प्रस्तुत गरेका थिए। प्रतियोगितामा सहभागी विद्यार्थीहरुलाई हिन्दूहरूको महान चाड तिहारको शुभकामना सहित शैक्षिक सामग्री पुरस्कारस्वरूप प्रदान गरिएको विद्यालयका प्रधानाध्यापक रोहित कुमार सिंहले जानकारी दिनुभयो ।
यसै अवसरमा तिहारमा खेलिने देउसी–भैलो कार्यक्रम पनि विद्यालय परिसरमा गरिएको थियो। अनुशासित र मर्यादित रूपमा देउसी–भैलो खेल्न तथा खेलाउन विद्यार्थीहरुलाई प्रेरणा दिइएको शिक्षक चेत बहादुर परियारले बताउनुभयो । उक्त कार्यक्रमले विद्यार्थीहरूमा सांस्कृतिक चेतना अभिवृद्धि गर्नुका साथै सामाजिक सद्भाव र सहकार्यको भावना विकास गर्न मद्दत पु¥याएको विद्यालयले जनाएको छ ।
Discussion about this post