तेश्रो प्रयासमा नुम्बुरको सफल आरोहण

कार्तिक ६, साेलुखुम्बु । सोलुखुम्बुमा अवस्थित नुम्बुर हिमालको सफल आरोहण भएको छ । जिल्लाको सोलुदुधकुण्ड नगरपालिका वडा नम्बर १ मा रहेको ६ हजार ९ सय ५८ मिटर अग्लो हिमाल नुम्बुर आरोहणमा गएको टोलीले सोमबार चुचुरोमा टेकेको जनाइएको छ । सेभेन समिट ट्रेक कम्पनी मार्फत हिमाल आरोहणका लागी गएको ३ सदस्यीय टोलीले नुम्बुर हिमालको सफल आरोहण गरेर बेसक्याम्प फर्किएको जनाइएको छ ।  सेभेन समिटका कर्मचारी कर्मा छिरिङ शेर्पाका अनुसार नुम्बुर आरोहण गर्न गएको पोल्याण्डका आडम, जर्मनीका फोलिक्स र इटाली हर्भले  आरोहण सफल गरेर फर्किएका छन्  ।

उनिहरुले अक्टोवर १९ का दिन विहान करिव १० बजे नुम्बुरको चुचुरोमा पाइला टेकेको पर्यटन व्यवसायी तथा नुम्बुर बेसक्याम्प क्षेत्रका होटल व्यवसायी फुछिरि शेर्पाले बताउनुभयो ।   यस अघि सन १९६३ मा जापानी आरोहण दलका आरोहीहरूले आरोहणको प्रयास गरेको भएपनि उक्त प्रयास असफल भएको स्थानीय जानकारहरूले बताएका छन् । यस्तै दोश्रो पटक १९८१ मा फ्रान्सेली आरोहण दलका सदस्यहरूले समेत आरोहणको प्रयास गरेका थिए भने उनीहरू पनि असफल भएका थिए  ।

तर पछिल्लो पटक गएको २ वटा आरोहण टोली मध्ये एउटा टोलीले सफल आरोहण गरेको छ ।  गत असोज २५ गते तिर नुम्बुर बेसक्याम्प पुगेको आरोहण टोलीले आरोहण सफल गरेको सोलुदुधकुण्ड नगरपालिकाका मेयर नाम्गेल जाङबु शेर्पाले बताउनुभयो ।