सोलुखुम्बुमा विदेशी पर्यटक घाइते, प्रहरी र स्थानीयको सहयोगमा उद्धार

कार्तिक १०, सोलुखुम्बु । सोलुखुम्बुको खुम्बु पासाङल्हामु गाउँपालिका–४ क्याङजु क्षेत्रमा एक विदेशी पर्यटक लडेर घाइते भएका छन् । नेपाल भ्रमणका लागि हिमालयन प्रा.लि. कम्पनीमार्फत आएका डेनमार्कका ६१ वर्षीय नागरिक फ्र्याङ्क थोर्बोल लार्सन सगरमाथा आधार शिविर भ्रमण गरी फर्किने क्रममा खुट्टा चिप्लिएर लडेका हुन् ।

उनी घाइते भएको सूचना प्राप्त हुनासाथ इलाका प्रहरी कार्यालय नाम्चेबजारबाट खटिएको प्रहरी टोली तथा सोही पर्यटन कम्पनीका कर्मचारीहरूको संयुक्त सहयोगमा उद्धार कार्य गरिएको जिल्ला प्रहरी कार्यालय सोलुखुम्बुका प्रहरी निरीक्षक तथा सूचना अधिकारी विकास राईले जानकारी दिनुभयो ।

उद्धारपछि घाइते लार्सनलाई तत्काल उपचारका लागि नाम्चे स्थित ओम होङगिल नाम्चे सामुदायिक अस्पतालमा ल्याइएको र हाल उनको अवस्था सामान्य रहेको प्रहरी स्रोतले जनाएको छ । प्रहरीका अनुसार लार्सन बोल्न सक्ने अवस्थामा छन् र उपचारमा उनका बहिनी समेत संलग्न छन् । प्रहरीले सगरमाथा क्षेत्र भ्रमणमा आउने पर्यटकलाई हिँड्दाखेरि सावधानी अपनाउन र स्थानीय गाइडको सल्लाहअनुसार यात्रा गर्न अनुरोध गरेको छ ।