सगरमाथाको प्रवेशद्वार नाम्चे काटमार निषेधित क्षेत्र घाेषणा

कार्तिक ११, सोलुखुम्बु । सगरमाथाको प्रवेशद्वार भनेर चिनिने नाम्चे बजारलाई पुर्ण रुपमा काटमार निषेधित क्षेत्र घोषणा गरिएको छ । नाम्चे युथ क्लबको अगुवाईमा नाम्चे क्षेत्रलाई काटमार निषेधित क्षेत्र घोषणा गरिएको हो ।  भगवान गौतम बुद्धको “सबै प्राणीहरू हिंसाबाट थरथराउँछन्, सबै मृत्युबाट डराउँछन्, सबै जीवनलाई प्रेम गर्छन्” भन्ने शिक्षालाई आत्मसात गर्दै नाम्चे क्षेत्रका होटल पसल तथा व्यक्तिहरूका घरमा पालेका खसि, भेडा, कुखुरालाई खरिद गरि छुट्टै ठाउँमा सारेर नाम्चे बजारलाई पूर्ण रुपमा काटमार निषेधित क्षेत्र घोषणा गरिएको सगरमाथा प्रदुषण नियन्त्रण समितिका अध्यक्ष तथा यस अभियानका अभियन्ता लामाकाजी शेर्पाले बताउनुभयो ।  

प्राकृतिक प्रकोपका घटना बढिरहेको अवस्थामा बौद्ध धर्मप्रति आस्था राख्ने बौद्धमार्गी समुदायले धार्मिक विधि अपनाउँदा यसको रोकथाम गर्न सकिने विश्वासका साथ काटमार निषेधित क्षेत्र घोषणा गरिएको उहाँको भनाई छ ।  प्राणीलाई आफ्नो जीवन बाँच्न दिऔँ भन्दै उहाँले सबै मिलेर काटमारलाई अन्त्य गर्न पनि आह्वान गर्नुभएको छ ।  पर्यटकीय क्षेत्र तथा विश्वकै प्रमुख आकर्षणको हिमाल सगरमाथा भएकोले प्राकृतिक विपत्ति तथा भवितव्यमा कसैले पनि ज्यान गुमाउन नपरोस् भन्दै यहाँ काटमार निषेधित गरिएको हो ।  

अध्यक्ष शेर्पाले कुनै कालखण्डमा पनि पहिरो तथा बाढी जस्ता प्रकोपको सामना गर्नु नपरेको हिमाली क्षेत्रले पछिल्लो समय यस्ता घटनाहरू बढिरहेकाले पनि यसमा धार्मिक विश्वास जोडिएको उहाँको ठम्याई छ । अभियान अन्तर्गत नाम्चे युवा क्लवले ५२ वटा कुखुरा र ३ वटा भेडा खसीलाई उद्धार गरि जीवन दान दिइएको अध्यक्ष शेर्पाले बताउनुभयो ।  उहाँले गाउँपालिकाका सम्पूर्ण वडाहरूलाई नै काटमार निषेधित क्षेत्र घोषणा गर्ने अभियान समेत रहेको छ ।  हाल सम्म वडा नम्बर ३, ४ र ५ लाई काटमार निषेधित क्षेत्र घोषणा गरिएको छ ।