खुम्बु क्षेत्रमा हिमपात सुरु, पर्यटन क्षेत्र प्रभावित (फाेटाे फिचर)

कार्तिक ११, सोलुखुम्बु । विश्वको सर्वोच्च शिखर सगरमाथा अवस्थित सोलुखुम्बुकाे माथिल्लो क्षेत्र खुम्बुमा हिमपात भएको छ । मौसममा वद्लि आएसँगै हिजो साँझ देखि नै खुम्बुमा हिउँ पर्न थालेको हो । खुम्बुपासाङल्हमु गाउँपालिकाको तेङ्बोचे भन्दा माथिल्लो क्षेत्रमा मङ्गलबार बिहानै देखि हिमपात भइरहेको छ । 

खुम्बु क्षेत्रमा हिमपातका कारण पर्यटन प्रभावित भएको छ । सगरमाथा क्षेत्रको भ्रमणमा त्यस क्षेत्रमा पुगेका पर्यटकहरू होटल भित्रै थन्किएका छन् । हिउँ परेका कारण स्वदेशी तथा विदेशी पर्यटकहरू होटल भित्रै सुरक्षित स्थानमा बसेका छन् । नाम्चे बजारमा भने हिजो देखि नै पानी परिरहेको छ । तेङ्बोचे, लबुचे र सगरमाथा आधार शिविरमा हिउँ परिरहेको सगरमाथा प्रदुषण नियन्त्रण समितिका अध्यक्ष लामाकाजी शेर्पाले बताउनुभयो । अहिले माथिल्लो क्षेत्रमा ९ सयको हाराहारीमा विदेशी पर्यटक भ्रमणमा छन् । शरद सिजनको उत्तरार्द्धमा घुम्न आएका पर्यटकलाई हिमपातका कारण प्रभावित बनाएको छ । 

माथिल्लो क्षेत्रमा परेको हिमपातले पर्यटन उद्योग र मानिस तथा पशु चौपाया सबैलाई प्रभावित बनाएको स्थानीय पासाङ शेर्पाले बताए । खुम्बु क्षेत्रमा आज मात्रै हिमपात हुने र त्यस पछिका २ दिन मौसम सफा रहने मौसम विद् डेभिड ढकालले बताए । ३ दिन पछि भने फेरी हिमपातको संभावना रहेको मौसम विद ढकालको भनाई छ ।