मौसम विग्रीएपछि दूधकुण्ड हिँडेका पर्यटक बाटोबाटै फिर्ता 

कार्तिक १५, सोलुखुम्बु ।  प्रसिद्ध धार्मिक तथा पर्यटकीय स्थल दुधकुण्ड हिँडेका पर्यटकलाई मौसमले साथ नदिएपछि बाटैबाट फिर्ता हुनुपरेको छ । गत १३ गतेबाट सुरु भएको निरन्तरको झरीका कारण दुधकुण्डका लागी हिँडेका पर्यटकहरूले बाटोबाटै फर्किन परेको हो ।  नुम्बुर हिमालको काखैमा रहेको दुधकुण्ड पाखरीको भ्रमण ता अवलोकनका लागी मौसम खुल्ने बित्तिकै यात्रा तय गरेर निस्कीएका पर्यटकहरूका लागी दाँतमा ढुँगा परेजस्तै भएको छ ।  

चितवनका पर्यटक जयराम अधिकारी मौसम प्रतिकुल भएपछि दूधकुण्ड पुग्न नपाई विचबाटै फर्किन परेको बताउनुहुन्छ ।  मौसम खुल्छकी भनेर ३ दिन सम्म पर्खिएपनि मौसममा सुधार नआएपछि आफू फर्किन परेको उहाँको भनाई छ ।  समुन्द्री सतहबाट ४ हजार ५ सय ६० मिटर उचाइमा रहेको उक्त पोखरी अवलोकन भ्रमण गर्न देश तथा विदेशबाट पर्यटकहरू यहाँ आउने गरेका छन् ।
तर यो पटकको सिजनमा मौसमले साथ नदिएपछि यहाँ घुम्न आउने पर्यटकले फर्किनु परेको हो ।  मौसम खुल्दा दैनिक १ सय बढी पर्यटक दुधकुण्ड भ्रमणका लागी पुग्ने गरेकोमा मौसम प्रतिकुल बनेसँगै उक्त संख्या सुन्यमा झरेको दुधकुण्ड क्षेत्रमा होटल सञ्चालन गर्दै आउनुभएका व्वसायी फुछिरी शेर्पाको भनाई छ  ।