मौसम खराबीका कारण उडान प्रभावित, पर्यटकहरूको बसाइ व्यवस्थापनमा चुनौति 

कार्तिक १५, सोलुखुम्बु । लगातारको मौसम प्रतिकुलताका कारण देशकै सबैभन्दा धेरै विमानस्थल भएको जिल्ला सोलुखुम्बुमा हवाइ उडान प्रभावित भएको छ ।  ४ वटा विमानस्थल रहेको जिल्ला सोलुखुम्बुमा नियमित उडान हुने फाप्लु र लुक्ला विमानस्थलमा उडान ३ दिन देखी अवरुद्ध बनेको हो ।  शारदीय सिजनमा आगन्तुक पर्यटकहरूको चाप उच्च हुने अवस्था भएतापनि मौसममा आएको खराबीका कारण आवतजावतनै बन्द रहेको लुक्ला विमानस्थलले जनाएको छ ।  बेमौसमी वर्षातका कारण लुक्ला विमानस्थलमा हवाई उडान नहुँदा विदेशी पर्यटकहरू अलपत्र परेका छन् ।

घुम्नका लागी निश्चित समय लिएर आएका पर्यटकहरू फर्किन उडान नहुँदा विमानस्थल क्षेत्र पर्यटकले भरिभराउ छ  ।  मौसममा खरावी आएपछि लुक्लामा ३ दिन देखी उडान हुन नसकिरहेको एटिसी अफिसर नवराज कटवालले बताउनुभयो ।  यता सदरमुकाम नजिकै रहेको फाप्लु विमानस्थलमा पनि ३ दिन यता उडान हुन नसकिरहेको विमानस्थलले जनाएको छ ।  विशेषगरी सरकारी ध्वजाबाहक विमानले उडान भर्ने उक्त विमानस्थलमा समेत मौसमका कारणले ३ दिन देखी उडान बन्द रहेको हो । मौसममा सुधार आए उडान सुरु भइहाल्ने विमानस्थलका कर्मचारी एटिसी अफिसर आयुश थापाले बताउनुभयो ।

 बेमौसमी वर्षातका हवाई मार्ग मार्फत जिल्ला भित्रिने र बाहिरिने पर्यटकहरूलाई समस्या भएको छ ।  उडान नहुँदा पर्यटकहरूको बसाइ व्यवस्थापनमै चुनौति भइरहेको छ जनाइएको छ ।  नाम्चे क्षेत्रबाट गन्तव्यका लागी हिँडेका पर्यटकहरू लुक्लामा आएर थन्किनुपरेको अवस्था रहेको छ भने त्यहाँ पर्यटकहरुको बस्ने व्यवस्थापनमा चुनौति थपिएको सगरमाथा प्रदुषण नियन्त्रण समितिका अध्यक्ष लामाजी शेर्पाले बताउनुभयो ।  शनिबार दिउसोबाट मौसममा केही सुधार भएकाले उडान हुने आशा रहेको भएपनि पर्यटकहरूलाई उडान सुरु नभइन्जेल नाम्चेमै रहन भनिएको पनि उहाँको भनाई छ ।  उहाँका अनुसार उडान नहुँदा १ हजार हाराहारी मा पर्यटकहरू लुक्लामा अलपत्र परेका छन् ।