सोलुखुम्बुका जेनजी आन्दोलनमा घाइते युवालाई परिचयपत्र वितरण गरिँदै

कार्तिक १६, सोलुखुम्बु । सोलुखुम्बुमा जेनजी आन्दोलनको क्रममा घाइते भएका व्यक्तिहरूलाई जिल्ला प्रशासन कार्यालयले परिचयपत्र वितरण गर्ने भएको छ । गत भदौ २३ र २४ गते भएको जेनजी आन्दोलनका क्रममा घाइते भएकाहरूको नामावली गृह मन्त्रालयबाट प्राप्त भएपछि परिचयपत्र वितरण गर्न लागिएको हो ।

प्रमुख जिल्ला अधिकारी लिला कुमारी के.सी. पाण्डेले एक सूचना जारी गर्दै घाइते भएका व्यक्तिहरूलाई आवश्यक कागजातसहित उपस्थित हुन आग्रह गर्नुभएको छ । उहाँका अनुसार, घाइतेले उपचार गरिएको अस्पतालका कागजात, नेपाली नागरिकताको प्रमाणपत्र, अटो साइजका दुईवटा फोटो र सम्बन्धित वडाको सिफारिस पत्र लिएर जिल्ला प्रशासन कार्यालयमा उपस्थित हुनुपर्नेछ ।

जिल्लाका घाइते भएका युवाहरूमा २१ वर्षीया फुली शेर्पा, अविन राउत, २४ वर्षीय आशिष राई र नविन रसाइली रहेका छन् । प्रशासनका अनुसार, परिचयपत्र वितरणपछि उनीहरूले सरकारी राहत वा अन्य सहयोगका प्रक्रियामा सहजता पाउने छन् ।