ज्वालामाई देवीको मन्दिरमा वार्षिक मेला जारी, चौथो दिन देवीलाई गहनाले सजाइयो

कात्तिक १८, सोलुखुम्बु । सोलुखुम्बुको सोलुदुधकुण्ड नगरपालिका–३ तामाखानीस्थित धार्मिक तथा ऐतिहासिक महत्व बोकेको ज्वालामाई देवी मन्दिरमा वार्षिक मेला जारी छ । पूर्वको मनकामनाको रूपमा परिचित यो मन्दिरमा प्रत्येक वर्ष कात्तिक महिनामा मेला लाग्ने परम्परा रहँदै आएको हो ।

कात्तिक १५ गतेदेखि सुरु भएको मेला बुधबारसम्म चल्ने मेला व्यवस्थापन समितिले जनाएको छ । समितिका संयोजक मिलन पुलामी मगरका अनुसार भक्तजनहरूको भीडलाई सहज र सुरक्षात्मक वातावरणमा राख्न २० जना स्वयंसेवक र प्रहरी टोली खटाइएको छ । मेलाको चौथो दिन विशेष कार्यक्रमअन्तर्गत ज्वालामाई देवीलाई गहना लगाएर मन्दिर परिक्रमा गरिएको थियो । सो अवसरमा प्रमुख जिल्ला अधिकारी लिला के.सी. पाण्डे, जिल्ला प्रहरी कार्यालयका प्रहरी नायब उपरीक्षक मनोजित कुवँरलगायत अधिकारीहरूको उपस्थिती रहेको थियो ।

धार्मिक विश्वास अनुसार ज्वालामाई देवीको दर्शन गरेमा मनोकांक्षा पूरा हुने जनविश्वास छ । त्यसैले भक्तजनहरूले देवीलाई सुन, चाँदीका गरगहना चढाउने चलन रहेको मन्दिर व्यवस्थापन समितिले जनाएको छ । यो मन्दिरमा सोलुखुम्बुका विभिन्न ठाउँसँगै ओखलढुंगा, खोटाङ, रामेछाप र काठमाडौंलगायतका स्थानहरूबाट भक्तजनहरू दर्शनका लागि आउने गर्दछन् ।

कौशिक गोत्रका रेग्मी वंशका तुलेधामीकाअनुसार पूर्णिमा तिथिको विशेष मेलमा देवी गाईले पत्ता लगाएको धार्मिक कथा प्रचलित छ। यही विश्वासका कारण स्थानीय तथा बाहिरी जिल्लाका भक्तजनहरू श्रद्धा र आस्थाका साथ मन्दिरमा पुग्ने गर्दछन् ।