कृषि ज्ञान केन्द्र सोलुको फार्म व्यवस्थापन शाखाबाट साढे सात सय केजी स्याउ बिक्री

कार्तिक १९, सोलुखुम्बु । हिमाली जिल्ला सोलुखुम्बुको फाप्लुमा रहेको फार्म व्यवस्थापन शाखा बागबानीबाट साढे सात सय केजी स्याउ बिक्री भएको छ । फार्म व्यवस्थापन शाखाबाट आर्थिक बर्ष २०८२÷०८३ मा सात सय ५० केजी स्याउ बिक्री भएको हो ।

सहायक बागवानी विकास अधिकृत बालकुमारी राईका अनुसार सो शाखा ३५१ रोपनी क्षेत्रफलमा फैलिएको छ र त्यहाँ विभिन्न प्रजातिका स्याउ उत्पादन भइरहेका छन् । उहाँका अनुसार यस वर्ष स्याउ फुल्ने समयमा परेको वर्षाका कारण अपेक्षित मात्रामा उत्पादन हुन नसकेको हो । राईका अनुसार शाखामा उत्पादन भएको स्याउ जिल्लामै खपत भएको छ । किराको आक्रमणबाट स्याउ बचाउनका लागि बिभिन्न जैविक र यान्त्रिक उपायहरू अवलम्बन गर्दै आइरहेको समेत उहाँले बताउनुभयो ।

फाप्लुस्थित यस फार्म व्यवस्थापन शाखाले स्याउ सहित अन्य मौसमी फलफूल तथा तरकारीको उत्पादन र प्रविधिक सहयोगमार्फत जिल्लाका किसानलाई बागबानीमा आत्मनिर्भर बनाउन योगदान पुर्याउँदै आएको छ ।