संयुक्त राष्ट्रसंघको ८० औँ स्थापना दिवस पाँचखालमा विशेष कार्यक्रमसहित मनाइयो

कार्तिक २०, सोलुखुम्बु । संयुक्त राष्ट्रसंघको ८० औँ स्थापना दिवसको अवसरमा बिहीबार पाँचखालस्थित विरेन्द्र शान्ति कार्य तालिम केन्द्रमा विशेष समारोहको आयोजना गरिएको छ । कार्यक्रममा प्रधान सेनापति महारथी अशोक राज सिग्देल प्रमुख अतिथि रहेका थियो । सन् १९५८ देखि संयुक्त राष्ट्रसंघको आव्हानमा शान्ति मिसनमा सैनिक खटाउँदै आएको नेपाल हाल शान्ति सैनिक पठाउने मुलुकहरूको सूचिमा अग्रस्थानमा रहेको छ ।

यस्तै, महिला शान्ति सैनिक खटाउने देशहरू मध्ये पनि नेपाल पहिलो स्थानमा रहेको उल्लेख गरिएको छ । संयुक्त राष्ट्रसंघीय मिसन अन्तर्गत हाल विश्वका विभिन्न १० वटा मिसनहरूमा नेपाली सेनाका ५ हजार ८ सय १९ जना शान्ति सैनिक खटिएका छन्। विश्व शान्ति स्थापनाको क्रममा अहिलेसम्म ७४ जना नेपाली सैनिकले वीरगति प्राप्त गरेका छन् भने ७५ जना घाइते भएका छन् ।

कार्यक्रममा वक्ताहरूले विश्व शान्ति स्थापनामा नेपालको योगदानप्रति गर्व व्यक्त गर्दै आगामी दिनमा पनि नेपाली सेनाले शान्ति मिसनमा आफ्नो गौरवमय भूमिका निरन्तरता दिने विश्वास व्यक्त गरेका थिए ।

कार्यक्रममा रक्षा सचिव, नेपाल प्रहरी, सशस्त्र प्रहरी बल नेपाल तथा राष्ट्रिय अनुसन्धान विभागका प्रमुख तथा पदाधिकारीहरू, स्थानीय जनप्रतिनिधि, परराष्ट्र मन्त्रालयका अधिकारीहरू, मित्रराष्ट्रका सैनिक सहचारीहरू र सञ्चारकर्मीहरू लगायतको सहभागिता रहेको थियो ।