सुर्के–चौरीखर्क सडक निर्माणको औपचारिक शिलान्यास, एक वर्षभित्र काम सम्पन्न गर्ने लक्ष्य

कार्तिक २३, सोलुखुम्बु । सोलुखुम्बुको खुम्बु पासाङ ल्हामु गाउँपालिका–२ सुर्केबाट चौरीखर्कसम्म जोड्ने ६ किलोमिटर सडक ट्र्याक खोल्ने कार्यको आइतबार औपचारिक रूपमा सिलान्यास गरिएको छ । गाउँपालिका अध्यक्ष मिङमा छिरी शेर्पाको प्रमुख आतिथ्यतामा तथा वडा नं. २ का वडा अध्यक्ष आङ फुर्वा शेर्पाको अध्यक्षतामा सडकको शिलान्यास गरिएको हो ।

उक्त आयोजना “ङीम दोर्जी पर्यटक सडक सुर्के–नासाग्राह–मुसे–चौरीखर्क” नामक योजनाको रूपमा अघि बढाइने भएको छ । वडा अध्यक्ष आङ फुर्वा शेर्पाका अनुसार उक्त सडक निर्माण योजनाको कुल लागत ८ करोड ५९ लाख ३१ हजार ६ सय ८१ रहनेछ । सम्पूर्ण बजेट खुम्बु पासाङ ल्हामु गाउँपालिकाबाट नै विनियोजन गरिएको हो । उहाँका अनुसार सडक निर्माण कार्य एक वर्षभित्र सम्पन्न गर्ने लक्ष्य लिइएको छ । हालसम्म सडक सुर्केसम्म मात्र पुगेकोमा अब यो सडक गाउँपालिकाको केन्द्र चौरीखर्कसम्म जोडिनेछ ।

सिलान्याससँगै आइतबारदेखि नै सडक खन्ने काम सुरु गरिएको छ । कठिन भू–भाग र चट्टानयुक्त क्षेत्र भएकाले निर्माणमा केही चुनौती रहने अनुमान गरिएको वडा अध्यक्ष शेर्पाले बताउनुभयो । शिलान्यास कार्यक्रमलाई सम्बोधन गर्दै गाउँपालिका अध्यक्ष मिङमा छिरी शेर्पाले सडक निर्माण सम्पन्न भएपछि स्थानीय बासिन्दाको दैनिक आवतजावत सहज हुने, पर्यटन प्रवद्र्धनमा टेवा पुग्ने र आर्थिक क्रियाकलापमा गति आउने विश्वास व्यक्त गर्नुभयो । अध्यक्ष शेर्पाले यस सडकले गाउँपालिकाको विकास र समृद्धिको नयाँ ढोका खोल्ने भन्दै सबै सरोकारवालालाई सहकार्यका लागि आग्रह गर्नुभयो ।