लिखु पिके गाउँपालिकामा कृषि मेला तथा प्रदर्शनी हुने

कार्तिक २३, सोलुखुम्बु । सोलुखुम्बुको लिखु पिके गाउँपालिकामा कृषि मेला तथा प्रदर्शनी कार्यक्रम हुने भएको छ । गाउँपालिकाको आर्थिक वर्ष २०८२/०८३ को स्वीकृत वार्षिक बजेट अनुसार आयोजना हुने सो कार्यक्रम अन्तर्गत गाउँपालिकाको क्षेत्रमा उत्पादित विभिन्न कृषि उपज तथा वस्तुहरुको प्रदर्शन हुने भएको हो ।

गाउँपालिकाको सूचनाअनुसार मंसिर १३ गते हिमगंगा माध्यमिक विद्यालयको प्राङ्गणमा मेला तथा प्रदर्शनी आयोजना गरिने भएको हो । सो अवसरमा उत्कृष्ट कृषि उपज प्रदर्शन गर्ने कृषकलाई छनोट गरी पुरस्कृत पनि गरिने गाउँपालिकाले जनाएको छ ।

प्रदर्शनीमा तरकारी बाली, दलहन बाली, नगदे बाली, अन्न बाली, फलफूल, बागबानी बाली, जडिबुटी तथा मसला बाली, फङ्गस प्रजाति, औषधीय (मेडिसिनल) कृषि तरल पदार्थ, दूध तथा डेरीजन्य उत्पादन लगायतका कृषि उपज वस्तुहरु प्रदर्शन गरिने प्रमुख प्रशासकीय अधिकृत अग्नि प्रसाद पराजुलीद्वारा हस्ताक्षरित सूचनामा उल्लेख गरिएको छ ।