सोलुखुम्बुमा २२ हजार ६ सय डोज खोरेत विरुद्धको खोप लगाइने

कार्तिक २५, सोलुखुम्बु । गाईभैंसीमा लाग्ने खोरेत रोग उन्मूलनका लागि सोलुखुम्बुमा २२ हजार ६ सय डोज खोप लगाइने भएको छ । भेटेरिनरी अस्पताल तथा पशु सेवा विज्ञ केन्द्र सोलुखुम्बुका प्रमुख भिमलाल तामाङका अनुसार एक महिनासम्म चल्ने खोप अभियानमा उक्त खोप लगाइने भएको हो ।

कात्तिक २३ गतेदेखि मङ्सिर २३ गतेसम्म संचालन हुने शिविरका लागि लिखुपिके गाउँपालिकामा २ हजार डोज, खुम्बु पासाङल्हामु, महाकुलुङ, माप्य दुधकोशी र थुलुङ दुधकोशी गाउँपालिकामा २ हजार ५ सय डोजका दरले, सोताङ गाउँपालिकामा २६ सय, र नेचासल्यान गाउँपालिका तथा सोलुदुधकुण्ड नगरपालिकामा ४–४ हजार डोज खोरेत विरुद्धको खोप लगाइने छ ।

जिल्लाभरका किसानको पशुमा खोरेत रोग नियन्त्रण र उन्मूलन गर्ने उद्देश्यका साथ खोप अभियान सुरु गरिएको भेटेरिनरी अस्पताल तथा सेवा विज्ञ केन्द्रले जनाएको छ । सेवा विज्ञ केन्द्रका प्रमुख तामाङका अनुसार जिल्लाका सबै ८ वटै स्थानीय तहमा कात्तिक २३ गतेदेखि मङ्सिर २३ गतेसम्म अभियान सञ्चालन हुनेछ । किसानकै गोठमा पुगेर खोपकर्तामार्फत खोप लगाउने व्यवस्था मिलाइएको उहाँको भनाई छ ।

रोग नियन्त्रणसँगै उत्पादनमा वृद्धि र पशुपालक किसानलाई आर्थिक लाभ पु¥याउने लक्ष्यका साथ खोप अभियान सञ्चालन गरिएको प्रमुख तामाङले बताउनुभयो ।कोशी प्रदेश सरकारको ‘पशुजन्य पदार्थ निर्यातमा टेवा पुर्याई किसानलाई आर्थिक रूपले समृद्ध बनाऔँ’ भन्ने नाराका साथ अभियान सञ्चालन गरिएको हो । यस अभियानअन्तर्गत प्रत्येक बस्तीमा पुगेर खोपकर्ताले घरमै खोप लगाउने छन् । यसले ग्रामीण क्षेत्रका किसानलाई सहज र सुलभ सेवा उपलब्ध हुने कार्यालयको भनाइ छ ।

कार्यालयका अनुसार पहिलो चरणको खोप अभियान सम्पन्न भएपछि पुनः दोस्रो चरणको कार्यक्रम सञ्चालन गरिनेछ । सो क्रममा खोप लगाइएका पशुहरूमा रोगको अवस्थाबारे अनुगमन गरी पुनः आवश्यक व्यवस्थापन गरिनेछ । अधिकांश किसान पशुपालन व्यवसायमा निर्भर भए पनि पशुमा लाग्ने सामान्य रोग तथा उपचारको जानकारी नहुँदा समस्या भोग्दै आएका छन् ।

पशुमा लाग्ने रोगबारे जनचेतना फैलाउने काम पनि सँगसँगै भइरहेको प्रमुख तामाङले बताउनुभयो । खोप अभियानले किसानलाई आर्थिक रूपमा सबल बनाउन, पशुजन्य उत्पादन वृद्धि गर्न र रोग नियन्त्रणमा दीर्घकालीन प्रभाव पार्ने अपेक्षा गरिएको भेटेरिनरी अस्पताल तथा सेवा विज्ञ केन्द्रले जनाएको छ ।